КУЛЬТУР ДА ИСКУССТВО

«Мый ӱшанем, чыла лиеш сай манын…»

Зоя Висвис (Тимофеева) Морко район Ӱшӱттӱр ялеш шым шочшан ешеш шочын. Сылнылык тӱнялан изинек кумылан лийын. Школ деч вара Н.Крупская лӱмеш пединститутышто тунемын. Ӱдыржӧ шочмеке. Икмыняр жап йочасадыште тыршен. Вара ММЗ-ын тӱшкагудыштыжо воспитатель лийын. Шукыжым пашазе-шамыч коклаште жап эртен гынат, тудо сылнымутым ик татланат ӧрдыжеш коден огыл, сылне почеламутлам тыгак, ойлымашлам шочыктен. 1996 ий гыч «Кугарня» газетыште журналистын пашажым шукташ тӱҥалын: «Ужар лышташ» «Школ илыш», «Илыш йыжыҥ», «Оҥго» да моло лаштыклам ямдылен, рекламе материалым ыштен. Лач тушто ыштыме годым «Саска кӱмӧ пагыт» икымше почеламут сборникше савыкталтын, а чылаже кызыт марте 6 книгаже лектын.

«Журналист паша оҥай, но пашадар изи, санденак 2005 ийыште шке вием дене «Бизнес в Марий Эл» рекламе газетын икымше номержым луктынам, чумыр налмаште тиде савыктышым ямдылымаште 12 ий ыштенам. Тунам ӱдырем кугун полшен, тудо МОСИ-н экономике факультетшым тунем пытарен. Но кызыт «Бизнес в Марий Эл» редакцийыште ом ыште. Ик ий ынде Медведево посёлкышто верланыше Автодорожный техникумын тӱшкагудыштыжӧ воспитатель улам», – ойла Зоя Александровна. Каласыман, таче тиде тӱшкагудышто илыше-влаклан волгыдын кӧранаш гына кодеш: чолга да творческий шӱлышан тиде ӱдырамаш тушто «Оҥай еҥ-влак» («Интересные люди») клубым почын. Тушто писатель, поэт, артист да моло лӱмлӧ еҥ-влак дене вашлиймаш-влак эртаралтыт.

Пагалыме лудшо-влак! Таче ме Марий Эл культурын сулло пашаеҥже, Россий писатель да журналист-влакын ушемыштын членже Зоя Висвисын почеламут аршашыжым лудаш темлена.

 

 

Кай(ы)шылан корно

 

Тый кай(ы)шыч, а кай(ы)шылан корно,

Арам вученам мый толмет.

Мо лийын – тетла ынде мондо,

Огеш кӱл уэш пӧртылмет.

 

Шӧртнялгыше шыже садерыш,

Шкетак лучо таче лектам.

Эн сылне да лишыл ты верыш,

Поэзий саскамым луктам.

 

Тый кай(ы)шыч, а кай(ы)шылан корно,

Тек весе ила йӧратен.

Мо лийын – тетла ынде мондо,

Чонем шукертсек весе ден.

 

 

 

Мотор шыже

 

Эх, шыже пагыт… Волгыдо тӱс дене,

Ты шочмо лукыш йывыртал вашкет.

Ӱшӱт пӱртӱслан умыр ты кастене,

Шӧртнялге солыкым йыштак чиктет..

 

Мотор куэр вӱргене лышташ-влакым,

Мардеж пуалме ден пыртак рӱза.

Коеш сӧралын, пуйто сӱан вате,

Ончалын тудым, кумылет кӱза.

 

Йошкар шер дене темше поланвондым,

Сӱретче пуйто радынаш коден.

Чевер чурийже дене пуйто модын,

Эн сылнын тудым ойырен  возен.

 

 

Шочмо кече

 

Лывыла койылден, пӧрдын, модын,

Ӱжарала волгалт, кумыл ден.

Вашлиям уна-влакым, тек толыт,

Тек йоҥга суртыштем марий сем.

 

Шулдыран кайыкла ты кастене,

Уна-влакым чес дене сийлем.

Йывырталын, куан сай чон дене,

Нунылан тауштен мый ойлем.

 

Кеч эрта ийготна шиждегече,

А чон самырык садак тыгай.

Тек изиш шӱлыкаҥын игече,

Но шӱмем ожсылак лач тул гай

 

 

Эх, Орина,Орина

(Мыскара йӧре)

 

Сценыш лектын Орина,

Кадыргылеш… Орен ма?

Тышке-тушко вел модеш

Тувыр мучаш. О кертеш!

 

Вуйым тудо тыш да туш

Пӧрдыктылеш. Куш

Миен перна ала

Микрофонан ты Марля?

 

Калык чотак воштылеш:

– Муралтымет йӧршынеш

У семан моли чынак?

Ӧрыктарыш вет кернак.

 

Шкенжым таче ончыктен,

Йошкаргымеш я ырен.

Сем аланыш логалаш,

Мом гын ыштен каваршаш?

 

Эх,илыш…

 

Эх, илыш, йогынет ден кажным,

Шолашке я пурлашке вӱдылат.

Шергалын тӱрлӧ тылзым, жапым,

Коклаште йогалеш шинчавӱдат.

 

Тыгай шол ӱмыр корно еҥын,

Кунамже лыпланен сымыстара.

Вес кечын поранла трук шеҥын,

Куанле ош йолгорным петыра.

 

Садлан пӱрымашнан ю сапшым,

Кыртмен кучаш перна чот мыланна.

Лачак вет шоҥгеммеке акым,

Шонал да иктешлал ме налына.

 

 

Ӱшанем  

 

Мый ӱшанем, адак толеш лай шошо,

Пӱртӱс уэш волгалтын тӱзлана.

Тунам адак олмапуэмым, ошым,

Пелед шогалшым ужын, кап кана.

 

Мый ӱшанем, тыят лач мыйын семын,

Кастене сылне садышке лектат.

Чонеш логалше кайык муро семым,

Куан йӱк дене эплын колыштат.

 

Мый ӱшанем, чыла лиеш сай манын,  

У кумыл дене угыч шыргыжал.

Кавасе тылзе тек шымла йышт татым,

Шӱмна садак пырляште ожсылак.

 

 

 Чылажат куандарыше лишыл

 

Мыланем сымыстарыше, ныжыл,

Ужарген тӱзланалше пӱртӱс.

Нигунам чон куаным ом ӱштыл,

Кундемем сылнешта гын у тӱс.

 

Ончалам йӱкланалше ломберым,

Кумылем савырна адакат.

Пӧлекла Ӱшӱттӱр вий-куатым,

Капемланже мочоло ракат.

 

Чылажат куандарыше, лишыл,

Кечыйол чеверта у саскам.

Эҥыжвондын чеченле алгажым,

Кидышкем шыргыжалын налам.

 

Ит мондо

 

Ит мондо, нигунам ит мондо,

Толам гын угычын вашлий.

Вес таҥым йывыртал ит кондо,

Эреак чонышто тый лий

 

Ит мондо, ты жапнам ит мондо,

Тачат муралте ваш ончен.

Тора гыч шыргыжалын колто,

Лач икте омышто кончет.

 

Ит мондо, шӱмбелем, ит мондо,

Ойган гынат изиш чонем.

Шыма мутет изиш кеч кодо.

Тудат эмла ты сусырем.

Г.КОЖЕВНИКОВА

Опубликовать в Одноклассники

Добавить комментарий