Книгагудышто – чодырасе скульптур
Звенигово район Красногорский книгагудышто амалкалче Александр Карповын «Чодырасе скульптур» ончерже почылтын.
Ты тӧнежыште верысе талантан сӱретче, кидмастар-влакын пашаштым калык ончыко чӱчкыдын луктыт. А книгагудыжым 30 ий ончыч почмо. Альфия Гибадуллина ден Марина Васильева тыште вич ий тыршат, да тыгай ончер-влакым лач нуно чумырат.
«Чодырасе скульптур» выставкын авторжо Александр Карпов 1974 ийыште Ташкент олаште шочын, туштак кугыжаныш университетыште инженер-программистлан тунем лектын. 27 ияш улмыж годым 2000 ийыште Марий Элыш, Красногорский посёлкыш, илаш куснен. Кызыт тудо сурт-оралте-шамычлан проектым, дизайным ышта, а пу пӧртым сылнештараш поснак йӧрата. Ташкентыште илымыж годым СССР-ын тӱрлӧ кундемлаштыже лийын. Шочмо олаштыже шокшо, чодыра уке. Шокшо игечыжым тудо чотак йӧрата.
– Мый кызытат колызо-влакым ом умыло, – ойла Александр Юрьевич. – Йӱштӧ кечыште кузе колым кучат? Байдарке дене эҥер дене волат да эше чодыраштак малат… Мыланем тыгай экстремал поход ок келше.
Кеҥежым Александр Юрьевич пушеҥге гыч скульптурым пӱчкедаш тӱҥалын, санденак чодыраш чӱчкыдын лектеда, туштыжо поҥгым да емыжым пога.
– Чодыраште улмем годым мый пуйто вашталтам: тыге ныл ий тӱрлӧ укшым, вожлам погем. Погымо годымак нунын могай янлыкым але кайыкым ушештарымыштым ужаш тыршем? Южыжо ала мо дене мылам келша, садлан тудым мӧҥгышкем кондем. Обрабатыватлыме шотышто ойлаш гын, тидым шуэн ыштем – чия але лак дене веле чиялтем. Теве, ужыда, утыжым пӱчкедем? Тений куд у пашам ыштенам. Ончыкыжым тиде ончерым Йошкар-Олаште эртараш шонем, – каласыш кидмастар.
М.СКОБЕЛЕВ
