СПОРТ

Ямдылалтыт, патыр лийын кушкыт…

Ямдылалтыт, патыр лийын кушкыт…
Шукерте огыл Медведево район «Витязь» ФОК-ышто бокс дене Россий Федерацийын Вооружённый Вийжын Украиныште спецоперацийым эртарымыжлан пӧлеклалтше турнир эртен.
Тыгай шкешотан таҥасымашым эртарыше организатор-влак кокла гыч иктыже бокс дене спорт мастер, тренер М.Якаев лийын. Ик кечын кузерак тренировко эртымым, рвезе-влакын ямдылалтмыштым ончалаш миен тольым. 17-ше номеран училищеш верланыше ик спорт залышкыже пурышым. Рвезе-влак тӱрлӧ упражненийым ыштат…
– «Витязь» ФОК-ышто эртыше таҥасымашке шкем тергаш Татарстан, Чуваш Республик, Нижегородский, Кострома, Киров областьла гыч 12-16 ияш марте ийготан 215 спортсмен ушнен. Турнирым Марий Эл правительстве председательын алмаштышыже Степан Александрович Воронцов почын. Тудо военнослужащий-влакын Украиныште кӱлешан порысым шуктымышт нергенат шарныктен, чылаштлан патриот шӱлышан лияш темлен. Участник-шамыч чылан шке моштымыштым ончыктышт. Поснак Волжский, Курыкмарий районла гыч толшо, Йошкар-Олаште илыше да ямдылалтше спортсмен-шамыч технический сайын таҥасыше семын ойыртемалтыч. Сеҥышым вич тӱшкште ойырышна. Чылаштлан мончаш пураш келшыше пу гыч ямдылыме комплектым (пу ведрам, коркам, упшымат, пижергымат…) кучыктымо. Тидын шотышто спонсор «Лесодар» компанийлан, директоржо Владимир Романовлан кугу тау.
Мемнан пашан тӱҥ шонымашыже – ончыкылык самырык тукымым таза капкыланым, лӱддымым кушташ, патриотический шӱлышеш воспитатлаш. Арам огыл тренировкышко сарын ветеранже-влакат толыт. Южгунамже нунын дене вашмутланымашымат эртарена. Тыге тренировкына эшеат пайдалын эрта, шонем, – мане Максим Эрикович.
Чынак, тренироватлалтше-влак коклшате куграк ийготан-шамычат койыч. Кок спортсмен дене палыме лийна. Иктыже – Афганистаныште службым эртыше, боевой действийын ветеранже Юрий Алесандрович Каменщиков.
– Бокс дене тренировкыш арнялан кок-кум гана коштам. Тиде ынде илышын нормышкыжо пурен, манам. Ончыч Шернур район Шокшем ялыште чӱчӱем изамым кумылаҥден, а мыйже нуным ончен почешышт кошташ тӱҥалынам. Тыге спортын ты видышкыже 1982 ийыште ушненам. Жапше годым, армий деч ончыч, тӱрлӧ кӱкшытан турнирлаштат вием тергенам, – ойла Юрий Александрович. – Совет Союз мучко, тӱрлӧ олашашке лекме. Тылзеш ик-кок турнирлаште рингыште вийым тергыме. Тыге спорт мемнам пеҥгыдемден, вияным ыштен. Тунам мый «Трудовые резервы» клубын чапшым араленам. Участник-шамыч Олег Белов (вражым тудын дене Афганистаныште вашлтийынна), Алексей Киселев, Витя Рябинин да молат пырля ямдылалтынна, рингыш лектынна. Бокс варажым армийыштат, илышыштат пеш чот полшен. Шкем кузе кучаш тунемынна, икте-весылан полшаш, икте-весым пагалаш… Афганистаныште тул-вӱд вошт лектме, тӱрлыжымат ужмо, курык коклаште лийме, бойыштат… Тыге икте-весе кокласе иза-шольо кыл таче кечыланат кодын.
Теве рвезе-влакым ончем да нунынат пеҥгыдылыкышт шижалтеш. Тугеже ончыкылыкнан волгыдо ӱшанже уло: патыр кушкыт. Сандене нунат шке порысыштым кӱлеш семын шукташ тӱҥалыт манын ӱшанена. Ушештараш уто огыл, кызыт Марий Эл гыч шагал огыл марий рвезе Украиныште военный действийыште. Чаманен каласаш гына кодеш, геройла вуйым пыштышат улыт. Эртыше кечылаште Руэмыш Иван Тороповын капшым кондышт. Меат ужатымаште лийынна. Жалке, самырык улыт, но тиде спецоперацийын кӱлешлыкшымат умылыман. Сандене рвезе, пӧръеҥ чылаланат ямде лийшаш: шочмо кундемым, элнам аралыме шотыштат. А Российысе военный-шамыч коклаште мемнан земляк-герой-влакым, нунын подвигыштым палышаш, шарнышаш улына. Тек самырык тукым таза илыш-йӱлалан кумылаҥеш, спорт дене пеҥгыде кылым куча.
Боевой действийын ветеранже Юрий Каменщиков таче кечынат физический формым куча. Спортзалыш арнялан кок-кум гана толын каяш тырша. Турникыштат шкенжым коло гана нӧлталеш, отжиманийымат витле гана ышта. Але вара самырык-шамычлан пример огыл?
Ужам, грушо манметым эше ик пӧръеҥ чулымын лупша. Палыме лийна. Тиде Шернур район Мустай кундемын эше ик патырже – Владимир Васин. Варажым пале лие, тудат боевой действийын ветеранже, Чечняште служитлен.
– Мыйын шонымаште, кеч-могай пӧръеҥ спорт формым кучышыш. Ты спорт залыш мыйым Юрий Александрович конден. Тыгак тренер Максим Эриковичлан, ачаже СССР-ын спорт мастерже Эрик Николаевичлан кугу тау. Жапше годым таҥасымашлашкат луктын. Тиде чыла эртен, но залыш садак чон шупшеш. Спорт залыште иктаж упражненийым ыштет, капкыллан, кумыллан тугай ласка лиеш… Тидат вет илышын шкешотан ямже, сӧралже. Куандара, самырык-влак толыт, тренироватлатыт. Турнирламат эртарат, тыгаят кӱлеш, – ойла Владимир Степанович. – Украиныште спецоперацийлаште РФ президент Владимир Путинын, Верховный главнокомандующийжын, задачыжым шуктышо Обороно министерствын военнослужащийже-шамычым, Россгвардийым поддержатлыме семын бокс дене эртарыме турнират моткоч кӱлешан. Тек самырык тукым патыр, лӱддымӧ кушкеш, элнан ӱшанле эргыже лиеш, а вуй ӱмбалне канде кава лиеш, чыла вере тыныс озалана.
Е.Эшкинина.

Опубликовать в Одноклассники

Добавить комментарий