Туриаде-2023
Марий Элын командыже –нылымше
Саратов областьыште «Туриада-2023» спортивно-туристический лагерь 10-шо гана эртен. Марий Эл гыч сборный команде, йолын коштмо, вӱд да велодистанцийлаште, кумшо верыш лектын.
Тыгак спортивно-туристический эстафетыште кумшо верым налын. Ныл кече жапыште «Хвалынский» горнолыжный курортышто участник-влак велосипед дене кудалын таҥасымаште, вӱдыштӧ да йолын коштмо дистанцийлаште, культурно-познавательный ден творческий конкурслаште вийыштым тергеныт.
Таҥасымашлам луымшо юбилейный «Туриада-2023» спортивно-туристический лагерьым торжественный петырыме годым иктешленыт.
Тушто Россий президентын Юл кундемысе полномочный представительже Игорь Комаров лийын.
Тудын палемдымыж почеш, пытартыш икмыняр ийыште спортивно-туристический мероприятий палынак шукемын да участник-шамычат ятырак ушненыт. Мутлан, тачысе кечылан спортивно-туристический кружок ден клублаште 141 тӱжем йоча, самырык-влак заниматлалтыт. Спорт мастер-влак кум пачаш, спорт мастерыш кандидат-шамыч куд пачаш шукемыныт. Тыгодым тӱрлӧ разрядан спортсмен 3400 гыч 5200 еҥ марте шукемын. Тидым Юл кундем гыч участник-влак спорт туризм дене Российын чемпионатше ден первенствылаште мастарлыкышт дене ойыртемалтмышт, сеҥымышт, сай результатым ончыктымышт дене пеҥгыдемдат.
Чыла команде коклаште Марий Эл гыч сборный тений призёр радамыш логалын огыл, нылымше верыш лектын, но пеш сайын выступатлен. Эн ончыко Саратов областьын, кокымшыш Пермь крайын, а кумшо верыш Удмуртий гыч команде-влак лектыныт.
Игорь Комаровын палемдымыж почеш, таҥасымаш кажныштлан сай шарнымашым кода.
– Тыгай мероприятий мыланнат, тыландат кӱлешан. Кажне ийын у конкурс, таҥасымаш ешаралтыт. У сборный команде-влакын ушнымышт куандара. Тений Белоруссий, Казахстан, Узбекистан гыч ушнышо йолташна-влак поснак куандареныт. Нунат мӧҥгышкышт сай шарнымаш дене пӧртылыт манын, шонем. Вес ийын адакат ушнат, а вес элла гыч участвоватлыше-шамычын толмышт поро йӱлаш пура манын ӱшанем, – ойлен мучашлан Игорь Комаров.
Марий Эл Республикым вуйлатышын администрацийжын информаций паша пӧлкажын уверже негызеш Е.Эшкинина ямдылен.
