Кужэҥер районысо Йӱледӱр ял администраций ден «Памашъял кӱ карьер» акционер ушем коклаште ыштыме контрактлан кӧра ялласе корнылаште лакылам петыраш 300 тонн тыгыде кӱм кондымо.
Ял администраций вуйлатыше Татьяна Чиркован мутшо почеш, акционер ушемым вуйлатыше Александр Богдановлан корным ачалаш полшымыжлан, тыгак кӱм шупшыкташ техникым ойырымыжлан верысе калык тау мутым ойла. Яллаште илыше-влак шкештат ӧрдыжеш кодын огытыл, нуно, кольмым налын, тыгыде кӱм шараш полшаш лектыныт.
Ме Йывансолаште урем корным ачалыме годым лийна. Кужу урем мучко кӱм конден ястарыме тыгыде кӱ ора-влакым ужна. Тыште, клуб ваштареш, ныл еҥ тудым кольмо дене шара ыле.
Снимкыште: Людмила Кузьмина, Виталий Поликарпов, Вера Каменщикова, Вячеслав Каменщиков.
Вячеслав Смоленцевын фотожо.
