Эртыше шуматкечын Йошкар-Олаште Самырык-влакын кечышт эртен. Тидын дене келшышын, уремысе тӱвыра фестиваль лийын: рӱдоласе Патриарший площадьыште, Тӱвыра да каныме рӱдӧ паркыште, «Арена Марий Эл» манеж пелен, Рӱдӧ пляжыште интерактивный площадке-влак пашам ыштеныт.
Пайрем Патриарший площадьыште Марий Элысе Молодёжь политике комитетын председательже Станислав Игошинын комитет да республикысе правительствын лӱмышт дене саламлымашыж гыч тӱҥалын.
– Самырык-влакын кечышт – республикыште илыше молодёжьын веле огыл, тудын дене пашам ыштыше-влакын пайремышт. Лач нуно ӱдыр-рвезе-влакын моштымашыштым вияҥден шогаш полшат, чын корно дене виктарат. Ушештарыме шуэш: таче мемнан кугу Россий мучко самырык-влаклан усталыкыштым ончыкташ шуко йӧн уло. Тиде – Россий да округ кӱкшытан коло наре тӱрлӧ форум, конкурс, курс да грант-влак. Тиде йӧн дене пайдаланыза, вет чылажат – тыланда, самырык-влак! Тачысе пайремна формальный огыл уремысе тӱвыраште талантан ӱдыр-рвезе-влаклан пӧлеклалтеш, нуно мыланна 10 наре площадкыште 50 тӱрлӧ вид дене моштымашым ончыктат. Таче тыгак кажне кечын молодёжь дене пашам ыштыше-влакым саламлыме шуэш, лач нунылан кӧра самырык тукымна вияҥеш. Нуно тунемме верлаште, тӱвыра да каныме полатлаште, предприятий ден организацийлаште тыршат. Сандене Самырык-влакын кечышт – уло калыкын пайремже, – каласен тудо.
Станислав Игошин тыршен пашам ыштымылан да Марий Элыште молодёжь политикым илышыш пуртымылан комитетын Тауштымашыжым икмыняр еҥлан кучыктен. Нунын лӱмышт – Анна Артюшина (Кугыжаныш да муниципальный службо колледж), Евгения Пономаренко (Йошкар-Оласе администраций), Евгения Шашкова (Йошкар-Оласе администраций), Надежда Мухина (Самырык-влакын полатышт), Екатерина Беляева (Самырык-влакын полатышт), Александр Каменских (ПГТУ), Анастасия Кузнецова (МарГУ), Оксана Купцова (МОСИ), Светлана Мурзина («Авангард» рӱдер). Молодёжь политике комитетын Чап грамотыж дене Анастасия Антаковам (ПГТУ) палемденыт.
Уремысе тӱвыра фестиваль кышкарыште эн сай тӱҥалтышлан конкурсым эртарыме. Тушто сеҥыше команде-влаклан – Звенигово, Килемар , Медведево, У Торъял, Оршанке, Параньга, Шернур, Советский районласе да Йошкар-Ола гыч – ты кечын сертификатым кучыктеныт. Нуно кызытсе илышлан да самырык-влаклан кӱлешан проект-влакым ямдыленыт, илышыш пуртеныт.
Тидын деч вара пайрем дене чылаштым Йошкар-Олан мэрже Евгений Маслов саламлен.
– «Молодёжь» шомак оптимизм, илышлан куан, вий да эсогыл авантюризм дене кылдалтын. Тек чыла тиде Йошкар-Олаштына лиеш, санденак самырык-влаклан шкем вияҥдаш, илышыште шке верым муаш йӧным ышташ тыршена. Тек мемнан молодёжь мемнан дене ила да шке олажым чапландара! – каласен тудо.
Йошкар-Олаште молодёжь политикым илышыш пуртымаште надырым пыштымылан рӱдоласе мэрын Тауштымашан серышыж дене ты кечын Ольга Марасановам (ИП, мурым возышо да мурышо), Анна Петуховам (Йошкар-Оласе администраций) да Алёна Исаевам (Столичный бизнес-колледж) палемденыт.
Торжественный ужаш деч вара Патриарший площадь гыч байкер-влакын колоннышт, тыгак автопробегыш погынышо-влак эртен кудалыныт. Ты жапыштак площадке-шамыч пашаштым тӱҥалыныт: ик вере кызытсе куштымаш дене мастер-класс калыкым чумырен, вес вере ролик да скейт дене кудалыштме мастарлыкым ончыктеныт, уремысе футболат шке фанатше-влакым муын…
Уремысе культур самырык-влак коклаште кумдан чапланен. Тудо куштымаште, искусствышто, спортышто, музыкышто, модышышто тыглай огыл шонышо, ойыртемалтше еҥ-влакым уша. Тушко пурат: стрит-арт, стритдэнс, граффити, скейтбординг, стритбол, рэп. Самырык-влакын кечын нине культур площадке кокла иктыштыже мыят лийынам. Тиде – граффити. Ты ойыртемалтше искусство молодёжь коклаште таче ик эн кумдан шарлышылан шотлалтеш. Граффити – уремысе пӧрт пырдыжлаш але моло вере аэрозоль чия але чернила дене ямдылыме сӱрет, возымо мут-шамыч. Йошкар-Олаште илыше Олег Мясников ден Илья Белов лач тиде направлений дене площадкым ямдыленыт.
– Сӱретлаш ме иктаж латкум-латвич ий ончыч тӱҥалынна. Тунам лачак Йошкар-Олаште эртыше фестивальыш уло Россий гыч художник-влак толыныт ыле, ме тидым ужынна да изин дене кумылаҥынна. Тиде – мемнан хобби, тыгеже шкенан паша верна уло. Тыгак южгунам оласе администраций-влак йодыт сӱретлаш, ме йодмашым шуктена. Мом тудо пуа? «Самореализаций» манмет, наверне, а вес могырым – илышын ик ужашыже. Пӧрт пырдыж-влак сур гына ынышт лий, кумылым нӧлтышӧ лийышт манын шонена, – каласышт рвезе-влак.
Кечывалым тӱрлӧ площадке-влак пашам ыштеныт гын, кастене Патриарший площадьыште кумдан палыме россий музыкант DJ Smash ден Джаро концертым эртареныт. Мероприятийлаште Марий Элым вуйлатыше Юрий Зайцев лийын, тудо самырык-влакым пайремышт дене саламлен да каласен:
– Ончыко каяш, вияҥаш, тунемаш тыланем. А эше – эреак шочмо верым йӧратыза.
Г.Кожевникова
Авторын фотожо
