Марий Элын сулло журналистше, печать пашан ветеранже
Анатолий Васильевич АНДРЕЕВЫМ
65 ияш лӱмгечыж дене!
Тудат, Морко кундемын эргыже, «Марий коммуна» (кызыт «Марий Эл») газет редакцийыш 1978 ийыште толын. Пашажым кусарыше семын тӱҥалын. Вара промышленность, строительстве да транспорт отделыш налыныт да ик ият пеле гычак тудым вуйлаташ ӱшаненыт. Усталыкым поген шуктымеке, кок кутышын марий радиош куснен гынат, угыч да угыч марий газетыш пӧртылын. Собкорланат, мер-политике отдел вуйлатышыланат, спецкорланат, криминал йодыш дене редакторланат ыштен да кеч-куштат мастарлыкым ончыктен. Республик вуйлатышын учредитлыме «Марий Элын шӧртньӧ перожо» призымат газетнан журналистше-влак кокла гыч ик эн ончыч да тачысе кечылан шкетын гына налын. Сулен налме канышыш лекмекыжат, газет дене кылжым кӱрлын огыл. Кызыт шке кроссвордшо дене лудшо-влакым кумылаҥден шога.
Анатолий Васильевичланат пеҥгыде тазалыкым, кужу ӱмырым тыланена да ончыкыжат тыгаяк кумылзак лий, манына.
«Марий Эл» газетын пашаче ешыже
