Марий Элысе Шереметев замок дене кылдалтше кум проект «ДивоСувенир» всероссийский конкусышто финалыш лектын.
Нуно тыгай улыт: «Привет из замка Шереметева!» открытке-влак серий, «Дама с собачками» сувенир коллекций да «Окна замка Шереметева» проект.
«ДивоСувенир» конкурс «Диво России» XIII турист фестиваль годым эртаралтеш. Тений тудо икымше гана 13-15 сентябрьыште Махачкала олаште лиеш. Финалыш элна гыч эн сайлан шотлалтше сувенир проект-влакым чумырат, нунын коклаште Марий Эл гыч автор-влак Шереметев замок дене кылдалтше пашаштым эксперт-влаклан аклаш пуат.
Юрино посёлкышто верланыше тиде архитектур объект – мемнан республикын веле огыл, уло Юл кундемын «шӧртньыжӧ». Тудо усталык шӱлышан еҥ-влакым у пашалан кумылаҥда, у шонымашым шочыкташ полша. Тыгай конкурсын финалышкыже лекме пеҥгыдемда: Марий Эл сылне кундемлажым ончыкташ гына огыл, тудын йыр илышым оҥайым ышташ мастар.
Г.Кожевникова
Фотом Марий Элын Тӱвыра, савыктыш да калык-влакын пашашт шотышто министерствын сайтше гыч налме.
