КУЧЕМЫШТЕ

Вучат, полышым пуаш ямде улыт

24 февральыште Марий Эл вуйлатыше Александр Евстифеев ДНР ден ЛНР кундемла гыч граждан-влакым республикыш приниматлыме шотышто совещанийым эртарен.

Паша совещанийыште толшо-влакым кушко вераҥдыме, пукшымо, медицине полышым пуымо, туныктымо, жаплан илаш верым ойырымо да моло йодышымат каҥашеныт. Марий Эл вуйлатышын палемдымыж почеш, республикыште беженец-шамыч дене пашам ышташ паша группым ыштеныт.

– Чылан ситуацийым паледа. Ме Россий президентын Юл кундемысе полномочный представительже Игорь Комаров дене Донбасс гыч граждан-влакым пуртышо РФ-ын моло субъектлан опытшо шотышто кутыренна. Мыланнат неле ситуацийыш логалше еҥ-шамычлан полшаш ямде лийман, – совещанийым тўҥалмыж годым манын Александр Евстифеев.

«Донбасс гыч граждан-влакым вашлияш республике ямде», – ойлен регион вуйлатышылан Марий Эл правительстве председательын алмаштышыже Степан Воронцов. Донецк да Луганск калык республикла гыч толшо-влаклан жаплан илаш кум пунктым ямдылыме манын палемден тудо.

– Тиде Звенигово район Таир посёлкышто 140 еҥлан келыштаралтше «Журавушка» социально-реабилитационный рўдер, Куяр посёлкышто 150 еҥлан келыштаралтше самырык-влакым военно-патриотический воспитатлыме шотышто «Авангард» рўдер, 70 еҥлан келыштаралтше «Виктория» олимпийский резерв спорт школ. Ме 310 еҥлан келшыше вер-влакым ямдыленна. Йошкар-Олаш поезд дене толшаш улыт, – палдарен Степан Воронцов.

Степан Александровичын палемдымыж почеш, Донецк ден Луганск кундемла гыч еҥ-шамыч чылаже 7 вагон дене толыт. Толшо-шамычым вашлияш автотранспортым ойырат. Тылеч посна миграционный службо велымат тўткылык лиеш.

– Донецк, Луганск кундемысе калыкын пытартыш кандаш ийыште шот дене медицине полышым налашат йӧнышт лийын огыл. Умылена да шотыш налына: можыч, толшо-шамыч кокла гыч южыштлан медицине полыш кўлеш. Ковид чер дене черле але укем палаш экспресс-тестымат эртарыман, – палемден А.Евстифеев.

– Вокзалыш толшо-влаклан полышым пуаш медицине пункт лиеш. Тыгак врачебно-сестринский бригадым чумырымо. Кажне пунктыш кок врач-терапевтым, кок врач-педиатрым, ныл медицине пашаеҥым колтена, – увертарен Марина Панькова.

Тазалык аралтыш министр М.Панькован увертарымыж почеш, шапаш эм препаратым ямдылат, а палемдыме верыш толмекышт чылан тергымашым эртат.

Образований да науко министр Лариса Ревуцкая туныктымо шотышто йодыш решатлалтеш, манын.

– Ме кок йӧным темлена: тыглайым (стандартный), школышто тунемаш да дистанционныйым. «Авангард» ден «Журавушка» рўдерла туныкташ келыштаралтше улыт. Тўҥалтыш школлаште тунемше-влакым верыштак туныкташ темлена. Тыгодым Куяр посёлкысо кыдалаш школ дене кутырен келшыме. Кыдалаш да кугурак класслаште тунемше-шамычым шупшыкташ транспорт ойыралтеш. Автобус уло, – ойлен Л.Ревуцкая.

Молодёжный политике, спорт да туризм министр Лидия Батюкова волонтёр штабын ямде улмыжым палемден.

Волонтёр-влак рўдер Йошкар-оласе Самырык-влакын полатыштышт пашам ышта.

А полышым пуымо шотышто чыла йодышым 8(8362)63-00-39 номеран телефон дене рашемдаш лиеш.

Марий Эл Республик вуйлатышын организаций да аналитике виктемын уверже негызеш Е.Эшкинина ямдылен.

 

 

 

 

 

 

 

Опубликовать в Одноклассники

Добавить комментарий