Марий Элыште СВО-н участникше-влаклан полшымо кугыжаныш фондым ыштыме дене гуманитар полышым погымо да социальный йодышлам рашемдыме пашам келыштараш йӧн лиеш.
6 июньышто регионым вуйлатыше Юрий Зайцев Марий Элыште мобилизацийлан полшымо шотышто координационный советын заседанийжым эртарен.
Эртыше арнян республикыштына Специальный военный операцийын участникше-влаклан полшымо «Элым аралыше-шамыч» («Защитники Отечества») кугыжаныш фондын регионысо филиалже пашам ышташ тӱҥалын. Спецоперацийыште участвоватлыше-влакын да нунын ешыштын чыла социальный йодышыштым решатлымашке виктаралтше фондым Россий Федерацийын президентше Владимир Путинын кӱштымашыж почеш ыштыме.
«Фонд регионыштына сайын пашам ышта, йодмаш-шамыч уже улыт. Россий президентын шындыме задачыжым ме шуктен толына, фондым ыштыме дене кылдалтше мероприятий-влакым илышыш пуртымо шотышто лидер-шамыч коклаште улына. Тылеч посна мый специальный военный операцийым эртарыме кумдыклаште улшо подразделений-влакын вуйлатышышт дене мутланем. Проблемым, военнослужащий-шамычлан мо кӱлмым жапыштыже рашемдаш да полшаш манын, чыла уверым кучылтына. Сарзе-влакын йодмашышт чылаж годымак огыл материальный полыш дене кылдалтын, южгунам структурный ден административный обращений-шамычат лиедат. Нунымат тӱткыш деч посна кодаш огеш лий. Южыжо мемнан компетенцийыште огытыл гынат, рашемдаш лийме корным садак кычалына», – манын Ю.Зайцев.
Спецоперацийын участникше-влаклан гуманитар полышым погымо паша радам дене республикын промышленность, экономически вияҥмаш да торговльо министрже Станислав Крылов палдарен.
Палемдымыж почеш, республикын правительствыже транспортым ойыра, шергакан да технически нелылан шотлалтше прибор-влакым, тыгак поснак шуко йодмо сатум, мутлан, кемым, носким, термобельём, налеш. Муниципальный образований-шамыч личный посылке ден пуда, шуруп, бензопила гай тӱрлӧ тыгыде ӱзгарым погат. Мер организаций-влак штук дене ужалыме сатум наледат, салтак-шамыч дене мутланат да нунылан мо кӱлмӧ, тыгак кушто верланымышт нерген увертарат, грузым наҥгаен кодат. Бизнесат ӧрдыжеш ок код. Шуко амалкалче ден организаций тӱрлӧ сатум оксам пӧртылтыде налаш полша, услугымат ышта. Шергакан чыла приборым сарзе-влакын кидышкыштак кучыктат да тидым документ дене пеҥгыдемдат. Кызыт министерствын келыштарымыж дене процессын чыла участникше икте-весе дене вашла кутырен пашам ышта.
Гуманитар полышым адресно намиен пуаш кӱлеш, тыгодым сарзе-влаклан эреак кӱлшӧ формо, йолчием да моло сату нергенат мондыман огыл, ушештарен Марий Элым вуйлатыше.
Заседанийыште правительстве председательын алмаштышыже Ольга Бадма-Халгаева Специальный военный операцийын участникше-влаклан полшымо «Элым аралыше-шамыч» кугыжаныш фондын регионысо филиалжын пашаж нерген радамын каласкален.
Филиалым вуйлатыше Ренат Магсумов Ю.Зайцевлан тыгай пашам ӱшанымыжлан да лекше чыла йодышым решатлаш полшымыжлан тауштен.
Политический партий-влакын регионысо пӧлкалаштым вуйлатыше-шамычат Ю.Зайцевым спецоперацийын участникше-влаклан гуманитар полышым погымо пашашт дене палдареныт.
Марий Эл гыч сарзе-влаклан полыш регионын правительствыже, фондын филиалже, партий-влакын еҥышт дене пырля кугемшаш гына, заседанийым петырыме деч ончыч палемден Ю.Зайцев.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
