«Тачысе гай эпидемиологический ситуацийыште QR-код ковид ваштареш кучедалме мере семын кодшаш», – Республикыштына у коронавирус инфекцийым кондымым да шаркалымым шижтарыме шотышто оперативный штабын черетан заседанийыштыже регионысо калыкын да Кугыжаныш Погынын КПРФ фракцийжын депутатше-шамычын QR-кодым кораҥдаш йодмыштлан вашештен Роспотребнадзорын Марий Элысе виктемжым вуйлатыше Светлана Булатова.
«Общественный вер – тиде прививкым ыштыктыше, вакцинироватлалтдыме, черле да таза еҥ-влакым иктыш ушышо кумдык. Лач тыште COVID-19 дене черланен кертме лÿдыкшö эн кугу, сандене республикыштына QR-кодым пурташ пунчалме. Тиде тÿнямбал практике. Тылеч вара прививкым ыштыктыше-влакын шукеммышым, а черланыше-шамычын шагалеммыштым ужна. Кызыт ситуаций инфекцийын «омикрон» штаммже шарлымылан кöра начаремеш, сандене QR-кодым ковид ваштареш кучедалме мере семын арален кодымо верч улам», – манын тудо.
С.Булатован темлымыж дене регионын тазалык аралтыш министрже Марина Паньковат тӱрыснек келшен.
Марий Элым вуйлатыше Александр Евстифеев тÿвыра тöнежлаште вийыште улшо чарак-влак да нуным ешараш кÿлмö шотыштат йодышым рашемден.
С.Булатован палемдымыж почеш, кинотеатр, театр, тÿвыра пöрт гай тöнежлаште пашам чарен шогалташ але ешартыш чарак-влакым пурташ нимогай негыз уке, молан манаш гыч тушто эпидемиологический йодмаш-шамыч пеҥгыдын шукталтыт. Таче кечылан нине тöнежыште лиймылан кöра иканаште шуко еҥын черланымыж шотышто ик случайымат регистрироватлыме огыл.
Роспотребнадзорын Марий Элысе виктемжым вуйлатышын палемдымыж гыч, республикыштына у коронавирус инфекций дене кылдалтше сÿрет ончычсо семынак моткоч начар. Тений пашам ыштыме кокымшо арня гыч черланыше-влакын чотышт кенета кугемаш тÿҥалын. Пытартыш кок арняште COVID-19 дене инфицироватлалтме случайым кок пачаш шуко регистрироватлыме. Тиде ситуаций тÿҥ шотышто ковидын «омикрон» штаммжын писын шарлымыж дене кылдалтын.
«Тиде штамм дене инфицироватлалтше-влакын черышт куштылго формо дене ОРВИ семынрак эрта, ик еҥ тудым йöршын огеш шиж. Черланыше-шамыч кокла гыч 68 процент ужаш еҥ прививкым ыштыктен огыл, да иктат у коронавирус инфекцийым чытен лектын огыл», – рашемден С.Булатова.
Мут толмашеш, вакцинироватлалтше 367 тÿжем утла граждан кокла гыч у коронавирус инфекций дене 2102 еҥ (0,5%) гына черланен.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен.