Марий Эл Кугыжаныш Погынын председательже Михаил Васютин Курыкмарий районысо аграрий-влакым саламлен.
Эртыше кечылаште республикын парламентшым вуйлатыше Михаил Васютин адакат сайлалтме шке округышкыжо миен коштын. Ты гана тудо Козьмодемьянскыште коллегыже-влак дене вашлийын, Калык-влакын икоян улмо кечылан, Ялозанлык да перерабатыватлыше промышленность пашаеҥ-влакын кечыштлан да Марий Элын кечыжлан пӧлеклалтше мероприятийыште лийын.
Пайрем деч ончыч Михаил Васютин республикын ялозанлык да кочкыш сату министрже Павел Раевский, Курыкмарий районын вуйлатышыже-влак да марий парламентын депутатше Михаил Родионов дене пырля ярмиҥгашке миен. Тушто шке озанлык гыч емыж-саска ден пакчасаскам, мӱйым, телылан шапашлыме продуктым, кӱэштме кочкышым да шуко молым темленыт. Организатор-шамычын мутышт почеш, сатум ужален налме оксам Марий Эл гыч СВО-м эртарыме кундемыш сарзын порысшым шукташ кайыше-влаклан колтат.
Концертыште Михаил Васютин землякше-влакым шокшын саламлен, пашам кече еда тыршен шуктымыштлан, шочмо республикын экономикыжым вияҥдымашке кугу надырым пыштымыштлан да элнам аралыше-влаклан нойыде полшымыштлан уло шӱм-чонжо дене тауштен.
«Шочмо Марий Элнан пайремжым кугешнен да куанен палемдена. Тудо мемнан сеҥымашнам, поян тӱвыранам, шкешотан йӱланам да волгыдо ончыкылыкнам почын ончыкта. Сылне пӱртӱсан да пашаче калыкан Курыкмарий район – тиде тӱшка пӧртнан ойыраш лийдыме ужашыже», – палемден депутат корпусым вуйлатыше.
Пайремыште Курыкмарий районышто ялозанлык ден перерабатыватлыше промышленностьым вияҥдымашке кугу надырым пыштымылан да Марий Эллан 105 ий темме лӱмеш Кугыжаныш Погын председательын таумутшо дене «Хмель» ООО-н генеральный директоржо, районысо депутат-влак погынымашын депутатше Татьяна Денискина, кресаньык (фермер) озанлыкым вуйлатыше, Йоласал ял шотан илемысе депутат-влак погынымашын депутатше Александр Зиновьев да «Агролидер» кооперативын председательже, Эмӓн ял шотан илемысе депутат-влак погынымашын депутатше Артём Малов палемдалтыныт.
Маргарита ИВАНОВА.
Марий Эл Кугыжаныш Погынын фотожо.
