2 майыште Марий Эл вуйлатыше Юрий Зайцев 2019-2020 ийлаште эртыше «Лидеры России» конкурсышто сеҥыше Ирина Кугуелова дене вашлийын.
– Вуйлатыше семын мый профессионал, чолга еҥ-влакын кӱлмыштым палемден кертам. Кӧ кызыт конкурсышто сеҥышаш верч тырша, нунылан тушко ушнымо да таҥасыме опытда нерген каласкалыза, – темлен Юрий Зайцев тудлан.
Ирина Кугуелова участник-шамычлан Марий Элыште полыш пуалтмым палемден да конкурсышто сеҥыше ден тушко ушнышо-влак дене вашлиймашым жапын-жапын эртараш темлен.
– Республик гыч участник-шамыч кажне сезонышто федерал кӱкшытыштӧ регионым келшен толшын ончыктеныт. Марий Эл гыч финалыш але марте кум еҥ лектын. Кумытынат моткоч сай вуйлатыше улыт. Ик сезонышто мый сеҥенам. Кунам регион вуйлатыше шкеже сеҥыше-влак дене вашлиеш, тиде моткочак кумылаҥда. Тыгак моло ийлаште конкурсыш ушнышо-влакат шке опытышт дене пайлалт кертыт, – каласен Ирина Кугуелова.
Марий Эл вуйлатыше тиде темлымашым сайлан шотлен.
4 апрельыште «Лидеры России» черетан конкурс тӱҥалын. Тачысе кечылан тушко ушнаш Марий Эл гыч 235 йодмаш пурен.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
