30 майыште Марий Эл Кугыжаныш Погынын нылле кудымшо сессийже эртен. Тушто улыжат ик йодышым – «Марий Эл Республикыште сайлымаш нерген южо законодательный актышке вашталтышым пуртымо нерген» законын проектшым – ончымо.
Сессий деч ончыч законопроект дене Депутатын кечыштыже палдарыме, тылеч вара тудым парламент комитет-влакын заседанийлаштышт да Кугыжаныш Погынын президиумыштыжо лончылымо.
Парламентарий-шамыч Кугыжаныш Погыныш депутат-влакым сайлыме да верысе шкевиктем органлашке сайлымаш нерген законлашке темлыме вашталтыш-шамыч дене ик йӱкын келшеныт. Нуно чыланат республикысе закон-влакым федеральный сайлыме законодательствыш пуртымо пытартыш вашталтыш-шамыч дене келыштарымашке виктаралтыныт.
Законын у нормыжо-влак дене келшышын, депутатыш кандидат документым регистрацийыш пуымыж жаплан йот элын агентше лийшаш огыл. Документыштыже вашлиятше йоҥылыш ден опечаток-влакат кандидатым сайлымаште участвоватлыме деч кораҥдаш негыз лийыт.
Тылеч посна иноагентлан шотлалтше да экстремист але террорист организацийла дене кылдалтше граждан-влаклан сайлымаште эскерыше, кандидатын ӱшаныме еҥже да уполномоченный представительже лияш чаралтеш. Нуно тыгак сайлыме комиссийыште пунчалым лукташ йӱкым пуымо праван член, кандидат ден сайлыме объединений-шамычын сайлалтме фондыштлан, референдумын фондшо-влаклан полшышо еҥ лийын огыт керт.
Моло вашталтыш коклаште – тӱшка увер йӧнын представительже-влаклан сайлымаште аккредитироватлалташ йодмашым пуымо жап. Ынде тудым йӱклымӧ кече деч шым кече ончыч пуаш кӱлеш. Сайлымаш икмыняр кече эрта гын – йӱклымӧ икымше кече марте. Тымарте тидым кум кече ончыч ыштыме.
М.ИВАНОВА
Марий Эл Кугыжаныш Погынын фотожо
