Всероссийский йӱклымашын кум кече жапыштыже Марий Элыште илыше 30000 еҥ тӱзатышаш у объект-влак верч шке йӱкшым пуэн
Россий президентын темлымыж почеш илышыш шыҥдаралтше «Илыме вер да оласе среда» нацпроект дене келшышын, тӱзатышаш у объект-влакым ойырымо шотышто Всероссийский йӱклымаш кая. 15 гыч 17 март марте Марий Элыште илыше 30751 еҥ шке йӱкшым пуэн, тышеч 22754 йӱкым проектын волонтёржо-влакын полышыштлан кӧра погымо.
Тений йӱклаш 70 объектым – тӱшка кумдыкым тӱзатыме да уэмдыме объектлам да дизайн-проект-влакым – темлыме.
Илемдам кузе тӱзаташ: йоча площадкым уэмдаш, скейт-паркым чоҥаш я рӱдӧ паркым але вес верым шотыш кондаш – йӱклымӧ годым те шке ойыреда. Ончычсо ийласе йӱклымаш почеш Марий Элысе олалаште лийше вашталтыш-влак кызыт раш койыт. У современный парк, чонлан келшыше саклымвер (сквер), тӱрлӧ-тӱрлӧ, але шуко функциян манына, модмо да спорт площадке, калык тӱшкан коштмо тӱзатыме верла шинчалан вик пернат.
«Илыме вер да оласе среда» национальный проектын «Оласе средам йӧнаным ыштымаш» федеральный проектше – Марий Элыште илыше-влакын йӧратыме каныме верлаштым да оласе кудывече кумдыклам тӱзаташ полшышо пеш сай йӧн. Кушто могай кумдыкым эн ондак тӱзаташашым але уэмдышашым еҥ-влак шке ойырат. Тидыже моткоч кӱлешан», – палемда Марий Эл вуйлатыше Юрий Зайцев.
РФ-н субъектыштыже илыше 14 ияш деч кугурак ийготан кеч-кӧ йӱклымашке ушнен кертеш. «Госуслуги» платформо гоч 12.gorodsreda.ru сайтыште 30 апрель марте йӱклаш лиеш. Тыгак волонтёр-влак полшат, нуно чыла муниципалитет-участник-влакын йӱклаш темлыме объектышт дене палымым ыштат. Эн шуко йӱкым погышо объект-влакым шушаш ийыште тӱзаташ тӱҥалыт.
Шочмо олам тӱзатыме пашашке волонтёр-шамыч йӱклымашын икымше кечылаж гычак шке надырыштым пыштат. Доброволец-влак тендан кундемысе йӱклышаш объект-влак нерген каласкалат, йӱклымӧ годым лекше йодышым рашемдат. ДОБРО.РФ порталыште 167 тӱжем волонтёр аккредитацийым эртен, тышеч 1038 тӱжем йодмашыже – Марий Эл гыч.
«Кум кече жапыште – 15 гыч 17 март марте – ФКГС волонтёр-влак коло кум тӱжем наре йӱкым погеныт. Тугеже волонтёр штаб шке пашажым кӱлеш семын виктара, волонтёр-влак умбакыжат эшеат кӱкшӧ лектыш дене ыштат манын ӱшанена!» – ойла республикысе волонтёр штаб вуйлатыше Ильмира Хасанова.
Доброволец-влак ДОБРО.РФ сайтыште кызытат, йӱклымаш кайыме жапыштат, регистрироватлалт кертыт.
Оласе йырвелым тӱзатыме пашашке кажне ийын шукырак да шукырак еҥ ушна.
Йӱклаш вараш ида код. Йӱкледа – тугеже Марий Элым эшеат сайракым да моторракым ыштеда.
Марий Элын чоҥымо паша, архитектур ден илыме вер да коммунал озанлык министерствыжын уверже негызеш Л.СЕМЕНОВА ямдылен
