21 апрельыште Куяр лесничествыште «Шарнымаш сад» тӱнямбал акций тӱҥалын.
Ты кечын Марий Эл Кугыжаныш Погынын председательже Михаил Васютинын вуйлатымыж почеш марий парламентын коллективше, МЧС-ын, Социальный фондын, Вӱрым налме да пуымо станцийын, Газпром газораспределенийын, ЛДПР-ын пашаеҥже, волонтёр-медик-влак да тулык йоча-шамычлан наставничестве шотышто тӱшка 4 гектар кумдыкыш 10 тӱжем пӱнчым шынденыт. Акцийышке адакат Савино йоча интернат-пӧрт гыч ӱдыр-рвезе-влак ушненыт. Тений нунылан чолгалыкым ончыктымыштлан Пӱртӱс поянлык, экологий да йырвелым аралыме министерстве, тыгак Кугу Сеҥымашлан 80 ий темме символикан сувенир-шамычым кучыктеныт.
Йӱла почеш саламлыме мутым республикын пӱртӱс поянлык, экологий да йырвелым аралыме министрже Алексей Киселев ойлен. Марий Элыште «Шарнымаш сад» акцийын координаторжо да организаторжо Александра Гнутова Савино йоча пӧрт гыч изи воспитанникын полшымыж дене росотам шындыме шотышто мастер-классым ончыктен.
Тений пушеҥгым шындыме мероприятий-влак республикнан чыла муниципал районыштыжо 18 май йотке эртат. Акций жапыште 500 тӱжем утла пӱнчӧ росотам шындаш палемдыме, тышечын 300 утла кушкылым – Йошкар-Ола кундемыште.
Марий Элым вуйлатышын мутшо почеш, тений, Кугу Сеҥымашлан 80 ий темме идалыкыште, акций палынак ойыртемалтеш.
– Тудо Кугу Ачамланде сар жапыште Шочмо элын эрыкше верч кредалше да таче Российын интересшым умбакыже аралыше герой-влакын подвигышт нерген шарнымашым арален кодымашке чапле надыр лиеш, палемда Юрий Зайцев.
Марий Элыште «Шарнымаш сад» акций кудымшо гана эрта. Тиде жапыште тушко 12 тӱжем утла еҥ ушнен да 1 миллион утла пушеҥгым шынден.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
