Тетла уждымыла кояш огеш лий!

Марий Элыште вейп ден электрон сигаретым ужалаш чарынешт.

«Единый Россий» фракций Марий Элыште вейп ден электрон сигаретым ужалаш чараш темлен. Тиде мерын тӱҥ шонымашыже граждан-влакым, поснак ийготыш шудымо-шамычым, никотинлан тунемалтме деч аралыме дене кылдалтын.

Фракцийын темлымашыж шотышто шке шонымашыж дене Кугыжаныш Погын председательын икымше алмаштышыже Лариса Яковлева палдарен. Парламентарий вейп ден электрон сигаретым «троянский имне» дене таҥастарен, вет «тазалыклан лӱдыкшыдымырак алмаштышлан», тыгак модныйлан шотлымо гаджет самырык-влак коклаште пеҥгыдемын шуын гаяк.

– Йодышын пӱсылыкшым аклен мошташат огеш лий. Вейп ден электрон сигаретым шупшмо койыш подростко-шамыч коклаште пуйто эпидемийыш савырнен. Тиде законодатель-влак деч пеҥгыде мерым приниматлаш кӱлмӧ нерген ойла, – палемден депутат. – Пашаштына тӱҥжӧ – нацийын тазалыкшым арален кодаш. Ме шкенан гражданна-влакым, а эн ончычак ийготыш шудымо-шамычым, тӱжвач ончалмаште лӱдыкшыдымыла койшо, но чынже дене шояклыше рекламе деч аралышаш улына. Никотинлан изинек тунемше тукымын тазалыкым локтылмыжым уждымыла кояш правана уке!

Тиде пашаште икымше ошкылым ыштыме семын «Единый Россий» фракций правам аралыше органын, Роспотребнадзорын, Молодёжный парламентын, здравоохранений да образований сфер, муниципалитет-влакын представительышт, мер пашаеҥ, ача-ава-шамыч да калыкнан таза ончыкылыкшо верч тургыжланыше моло еҥ-влак дене «йыргешке ӱстелым» эртараш темла.

– Марий Элын Кугыжаныш Погынжо тиде темлымашым чыла велымат онча, тудын дене келша да правовой пунчалым луктеш манын ӱшанена. Калыкнан тазалыкше – тиде, мутат уке, Марий Элын поянлыкше да вияҥме негызше, – манын Лариса Яковлева.

Маргарита ИВАНОВА.

Марий Эл Кугыжаныш Погынын фотожо.