2023 ийыште адресный инвестиций программе почеш Йошкар-Олаште коммунал инфраструктурын кок объектшым пашаш колтышаш улыт.
Тачысе кечын Козьмодемьянск тракт да Йыван Кырла урем гоч Черняков урем деч Бауман урем марте шуйналтше кучылтмо вӱдын шке йоген кайыше коллекторжым пужен уэмдыме да канализаций насос станцийым чоҥымо паша ышталтеш.
2 февральыште Россий Федерацийыште регион-влакын вияҥмышт шотышто правительственный комиссийын заседанийыштыже тӱрлӧ кундемлаште федеральный адресный инвестиций программе кузе шукталтме, чоҥен шуктыдымо объект-влакын чотыштым шагалемдыме, коммунал инфраструктырым уэмдыме йодыш-влакым каҥашеныт. Заседанийым Россий правительствын председательжын алмаштышыже Марат Хуснуллин вӱден, тушко Марий Элым вуйлатыше Юрий Зайцеват ушнен.
Вице-президент палемден: регионлаште корным ышташ, коммунал инфраструктурым уэмдаш палемдыме окса лимитым, тышкак пурышо ешартыш финансирований кӱшеш средствам ойырымо йодышым РФ президент Владимир Путин шкежак терген шога.
Йошкар-Оласе кучылтмо вӱдын шке йоген кайыше коллекторжым пужен уэмдаш 290 миллион теҥге ойыралтын. Контрактым пеҥгыдемдыме, паша кая, объектым идалык мучаште эксплуатацийыш колташ палемдыме.
Олан рӱдӧ ужашыж да Изи Какшан вес велже гыч, тыгак лишне верланыше ялла гыч еҥ-влакын кучылтмо вӱд погынымек, тудым КНС-5 вес вере тулен колта. Тиде насос станцийым шошым чоҥен пытарышаш улыт. Ты пашалан 300 миллион наре теҥге ойыралтеш.
Марий Эл вуйлатыше Юрий Зайцев инженер сеть да объект-влакым умбакыжат уэмдыме йодышым федерал кӱкшытыштӧ ик гана веле огыл шынден. Коммуникцийым шотыш кондена гын, аварий лийын кертмым кораҥдена, ола ден ял-влаклан вияҥашышт йӧн лектеш, чыла тидыже калыкын илышыжым саемда манын палемден. Январьыште пале лийын, чыла тиде пашам шукташ Марий Эл 615 миллион теҥгем налеш. Региональный программыш 8 объектым пуртымо. 2013–2024 ийлан чумыр финансирований кугыт 746 миллионыш шуэш.
Чоҥен шуктыдымо объект-влакын чотыштым шагалемдыме йодышым тарваташ гын, Марий Элысе «пондашан» объект-влакым республикын социально-экономический вияҥмаш индивидуальный программыш пуртымо. 2022 ийыште тыгай объектым 47-лан шагалемдыме.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
