Регионын Тазалык аралтыш министерствыштыже тений кеҥежым калыкын тазалыкшым пеҥгыдемдыме да тӱрлӧ чер дене черланен кертме деч аралыме пашам чолгаҥдаш, тудым кок направлений дене эртараш палемденыт.
Мут – медицине организаций-влакын, Йошкар-Оласе шуко пачеран пӧрт-шамычын кудывечышкышт шуматкече еда миен, куснылшо «Тазалык пунктышто» калыклан диспансеризацийын икымше йыжыҥжым эртарыме, тыгак арня мучко пациент-влакым экспресс-йӧн дене шымлыме нерген.
Тиде пашам 1 июньышто Тӱвыра да каныме рӱдӧ паркыште тӱҥалме. Йошкар-Оласе 1-ше №-ан поликлиникын пашаеҥже ден 2-шо №-ан поликлиникын эндокринологический рӱдержын специалистше-влак икымше «Тазалык пунктышто» 150 наре пациентын капкыл кӱкшытышт ден нелытыштым, вӱрысӧ сакыр ден холестеринын чотыштым, давленийыштым, шинча кӧргысӧ давленийыштым висеныт, антропометрийым эртареныт.
Тиде кечын «Тазалык пунктым» посна кудывечыште организоватлаш 32 йодмаш пурен. Акцийын паша радамжым ямдылыме годым нине адрес-влак шотыш налалтыт.
Тыгаяк мероприятий 5 июньышто Чавайн бульварысе ик кудывечыште эртен. Йошкар-Оласе 1-ше №-ан поликлиникын пашаеҥже-влак 111 пациентым приниматленыт. Экспресс-шымлымаш годым кок пациентын глаукомо дене черланен кертмыштым рашемденыт да келгынрак тергалташ поликлиникыш направленийым пуэныт.
Проектын кокымшо корныжо – «Тазалык кече-влак». Тудын кышкарыштыже аҥысыр специализациян врач-шамыч республикын районлашкыже лектыт. Акцийыште Йоча республиканский клинический да Республиканский клинический больнице-влакын медикышт участвоватлат. Тора илемлашке районысо специалист ден куснылшо медицине комплекс-шамыч мият да калыкын тазалыкшым флюорографий, маммографий, моло йӧн дене шымлат.
– «Таза республик» кеҥеж акцийлан ямдылалтме годым ме могай районышто лачшымак могай врачын кӱлмыжым уже рашемденна, – палемда Йоча республиканский больницын тӱҥ врачше Дмитрий Груздев.
Акций 4 июньышто Марий Турек районысо Косолоп врачебный амбулаторийыште стартым налын. Ты кечын 80 пациент республикысе тазалык аралтыш тӧнежла гыч мийыше гастроэнтерологын, кардиологын, гинекологын да тӱшка практике врачын приёмыштышт лийын, куснылшо флюорографыште диагностикым эртен.
6 июньышто аҥысыр специализациян врач-влак Оршанке районысо больницыште йоча-влакын тазалыкыштым тергеныт, 13 июньышто Килемар районыш кудалыт.
Мероприятийыш «Порылыкым – ялыш» акцийыште шкем сай велым ончыктышо волонтёр-медик-влакат ушнат. Нуно йӱдвел ошкылмаш да когнитивный гимнастике шотышто мастер-классым ончыктат, икымше медицине полышым пуаш, пӱйым чын эрыкташ, тазалыкым эскераш туныктат, шӱм-вӱргорно да онкологий чер деч аралалтме йӧн-шамыч дене палдарат.
Куснылшо «Тазалык пункт» ден «Тазалык кече» акцийын паша радамышт нерген Марий Эл Тазалык аралтыш министерствын сайтыштыже пален налаш лиеш.
М.ИВАНОВА
Марий Эл Тазалык аралтыш министерствын фотожо
