ПАТЫРЛЫК Сеҥымаш СПОРТ ТАЗАЛЫК

Волжск ола гыч рвезе – шӧртньӧ медальын озаже

Грек-рим кучедалмаш
Волжск ола гыч рвезе – шӧртньӧ медальын озаже
23 майыште Пошкырт кундемыште грек-рим кучедалмаш дене СССР-ын сулло тренерже Владимир Борманым шарныме лӱмеш элнан первенствыже иктешлалтын. Турнирыште 16 ияш марте рвезе-шамыч вийыштым тергеныт.
Марий Эл гыч Владислав Бырля (тренерже Александр Серяков) 57 килгорамм нелытан-влак коклаште икымше верым налын.
Марий Элын спорт кучедалмаш дене федерацийын палемдымыж почеш, Волжск ола гыч Владислав куд вашлиймаште куд ганажат ӱшанлын сеҥен.
Таҥсымаште Российын 65 регионжо гыч 600 спортсмен вийжым терген.
Регионнан чапшым Йошкар-Ола ден Волжск гыч шым спортсмен арален. Ушештарена, турнир Рима Баталова лӱмеш спорт рӱдерыште эртен.
Ты рӱдер Российыштыжат ик эн кугулан шотлалтеш. Тудо Уфаште чоҥалтын. Тудлан тӱнямбал кӱкшытан паралимпийский спортын легендыже куштылго атлет Рима Баталован лӱмжым пуымо.
Тиде чолга марий ӱдырамашын эн шуко наградыже.
Башкортостан гыч кеҥеж паралимпийский модмашын чемпионжо Рима Акбердиновна Баталова Сеулышто (1988), Барселонышто (1992), Атлантыште (1996), Сиднейыште (2000), Афиныште (2004), Пекиныште (2008) эртыше Паралимпиадылаште вийжым терген да 100, 200, 400, 800, 1500, 3000, 5000 метрыш куржталмаште 13 гана чемпион лийын. Начарын ужшо инвалид-влак коклаште 18 гана тӱнямбал, 43 гана Европын, шуко гана СССР-ын, Российын, Башкортостанын чемпионкыжо семын палыме. Тӱнямбалне 36 гана рекордсменкыже 6 гана почела паралимпийский модмаште вийжым терген. Тудо 20 гана тӱнямбал рекордым шынден, Гиннессын рекорд книгашкыже логалын.
Е.Эшкинина.

Опубликовать в Одноклассники

Добавить комментарий