ТАЗАЛЫК

Эше кок еҥ черланен

Марий Элыште у коронавирус инфекций дене эше кок еҥ черланен.

У коронавирус инфекцийым республикыш кондымым да шаркалымым шижтарыме шотышто оперативный штабын данныйже почеш, регионыштына тиде чер дене эше кок еҥ черланен.

Тыге, Марий Элыште COVID-2019 вирус дене черланыше-влакын чотышт нылыт марте шуын.

Ты гана коронавирус вате-марийым авалтен. Тылеч ончыч нунын кокла гыч иктыжын черланыше еҥ дене кылже лийын.

Черланымыштым пеҥгыдемдыме жаплан вате ден марий уже  Йошкар-Оласе больницыште эмлалтыныт. Марий Эл Минздравын увертарымыж почеш, тазалыкышт «кокла нелылыкыште» улмо семын аклалтеш. Респираторный полыш когыляныштат огеш кӱл. Нуно умбакыже эмлалтыт.

«Больницыште кийыше-влак шкеныштым сайын шижыт. Стационарыште нуным кӱлын эмлат. Черланыше-шамычын тазалыкышт нерген специалист-влак мыланем увертаренак шогат. Коронавирус инфекций дене тылеч ончыч черланыше эше кок пациент таче кечылан тӧрланыме, паремме йыжыҥыште улыт. Нуным мӧҥгӧ колташ ямдылат», – палемден Марий Элым вуйлатыше А.Евстифеев.

1 апрельыште 16 шагат жаплан 1083 еҥым, ты шотыштак 1040 россияниным да 43 йот гражданым, медицине велым эскереныт, 625 еҥым, ты шотыштак 10 йот гражданым, учёт гыч кораҥденыт.

Ушештарена, Марий Элым вуйлатыше Александр Евстифеевын 2020 ий 17 мартыште лукмо указше дене келшышын, регионыштына утларак ямде улмо режимым ыштыме, 30 март гыч республикыште илыше чыла еҥлан мӧҥгыштӧ посна лийме обязательный режимым илышыш пуртымо. Нине мере-влак у коронавирус инфекцийын шарлымыжым чарен шогалташ виктаралтыныт.

Регионысо калык илыме вержым коден кайышаш огыл. Мӧҥгӧ гыч экстренный полышым налаш, пашаш каяш, лишыл кевытыш да аптекыш миен толаш гына лекшаш. Тыгак пийым але мӧҥгыштӧ ашныме вес чонаным уремыште пӧрт йыр (100 м деч тораште огыл) коштыкташ, торым лишыл контейнерыш намиен кудалташ лиеш. Уремыште да кевытлаште икте-весе деке 1,5 м деч шукылан чак лишемме деч шекланыман.

Марий Элым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий