Марий Эл вуйлатыше Юрий Зайцев Россий Бокс федерацийын генеральный секретарьже Александр Беспутин дене паша вашлиймашым эртарен.
Нуно ончыкыжым республикыште спортын тиде видшым вияҥдыме нерген мутланеныт да регионын правительствыж ден «Бокс прогресс рӱдер» коммерческий огыл автономный организаций коклаште вашкылым ыштыме нерген ойпидышым подписатленыт.
Юрий Зайцев республикыште спортсмен-влакым ямдылаш базе уло да сай боксер йӱла шочеш манын палемден.
– Шукерте огыл Йошкар-Олаште бокс дене тӱнян кок гана чемпионжо Раимкуль Малахбековын кубокшым эртарышна. Таҥасымаш жапыште мемнан деке толшо чемпион, почетан уна, турнирын участникше-влак Марий Элыште сай спорт инфраструктур улмым палемденыт. Но мемнан тудым эшеат вияҥдаш кугу вий-куатна уло. Лӱддымылыкым йодшо тиде спорт дене кылым кучаш шонышо тӱрлӧ ийготан йоча ден кугыеҥ-влак республикыште илат. Тидлан спорт базым вияҥдаш кӱлеш: объект-шамычым чоҥыман да уэмден тӧрлатыман, бокс дене заниматлаш материально-технический условийым саемдыман, – ойлен Марий Эл вуйлатыше.
Александр Беспутин республикыште спортлан, поснак бокслан тӱткышым ойырымылан Юрий Зайцевлан тауштен.
– Кунам регион вуйлатыше спорт пашашке ушна, тиде моткочак сай. Тыланда кӧра Марий Эл шке боксер шоуж дене чаплана. Ме Марий Элыште чапланыше «Удар на силу» таҥасымашым вияҥдаш кумылан улына. Адаптивный спортым вияҥдаш да тидын годымак СВО-н участникше-влаклан полшыман, – палемден Россий Бокс федерацийын генеральный секретарьже.
Таче регионышто бокс дене 2600 утла еҥ заниматла, нунын кокла гыч 306 спортсмен спорт ямдылалтмаш программе дене ямдылалтеш, 8 еҥ – Российын спорт мастерже.
Марий Элыште кажне ийын бокс дене тӱрлӧ кӱкшытан 15 да тылеч утларак официальный мероприятий эрта. Мутлан:
- Волжск олаште республикын сулло тренерже Гумар Мухамедзяновым, Российын Геройжо Марк Евтюхиным шарныме лӱмеш турнир-влак;
- 2024 ийыште Марий Элыште 13-14 ияш-влак коклаште Юл кундем федеральный округын первенствыже лийын;
- тений майыште икымше гана Специальный военный операцийын ветеранже-влакын ассоциацийыштын турнирышт эртен;
- кок ий почела Йошкар-Олаште Патриарший площадьыште кугу пайрем – Бокс фестиваль – лийын.
2027 ийлан ПФО-н Чемпионатшым да Первенствыжым Марий Элыште эртараш йодмашым пуымо.
Марий Эл вуйлатышын пресс-службыжын уверже негызеш Любовь Камалетдинова ямдылен.
