Российысе «Орлёнок» йоча рӱдерын книгагудыжын курчак коллекцийже эше ик шергакан экземпляр – марий курчак — дене пойдаралтын. Тудым Кужэҥер район Йӱледӱр кыдалаш школын 4-ше классыштыже тунемше-влак колтеныт.
А пеленже тыгай серышым возеныт:
«2023 ий майыште ме, Марий Элысе Йӱледӱр кыдалаш школын 4-ше классышкыже коштшо-влак, «Орлёнок» рӱдерын «Содружество Орлят России» федеральный сменыштыже лийынна.
Мыланна чылажат келшен: шукынжо илышыштышт икымше гана курык ден теҥызым ужыныт. «Штормовой» лагерьнат шке йӱлаже, атрибутикыж дене кумылым савырыше лийын. Ме «Орлёнокын» тоштерышкыже экскурсий дене миенна, «Мастар-влакын аллейыштышт» пашам ыштенна, тӱрлӧ мероприятийыш ушненна. А эн оҥай верже – книгагудо. Тудо шуко книгаж дене ӧрыктарен, нуныжым шӧрлыклаш моткоч оҥайын вераҥденыт, эсогыл кӱварыште кийышат уло. Книга деч посна тудо оҥай арвер-шамычлан поян: теҥыз пундашыште илыше-влак да моло дене палдара. А лӱмегож ӱстембалже пуйто ала-могай йомак гыч «толын». Книгагудышко пурымаштак ты шӱлыш шижалтеш. А «юзо тошкалтышыш» шинчатат, ала-могай сай вийым шижат да чоным порылык авалта.
Книгагудышто ме национальный вургеман курчак-шамычым ужынна. Мордва, удмурт, татар пошкудынан-влакын улыт, а мемнан, марийын, уке. Санденак ме тыланда пӧлек семын марий вургеман курчакым колташ шонен пыштенна. Тудо книгагудын коллекцийыштыже шке вержым муэш манын ӱшанена».
Г.Кожевникова
Фотом Кужэҥер районысо администрацийын образований пӧлкажын сайтше гыч налме
