Тиде кидмастар дене, Надежда Сидоркина дене, У Торъял районлан 100 ий теммылан пӧлеклалтше пайремыште палыме лийынна ыле. Но тунам жап моткоч шыгыр да мутланен шына шукто.
А шукерте огыл, ончем, Йошкар-Олаште Чарла кремльыште эртаралтше мероприятий кайыме жапыште ятыр моло кидмастар-влак коклаште тудат шке пашажым еҥ-влаклан ончыкташ да темлаш конден. Туштыжо воктечше тыглай гына эртен каен шымак керт. Ындеже мутым вашталташак лийым.
Надеждан ӱстембалныже могай-гына кидпашаже-влак уке улыт ыле: шӱшер, браслет, аралтыш… Но эн шукыжо – тӱрлӧ деч тӱрлӧ сынан пылышкӧрж. Нуныжо ожнысо марий сӧрастарышым ушештарышат, стилизованный манме, да кӱчыкат, кужуракат лийыныт. Кажныжым кидыш налын, лишычрак ончаш кумыл лектын. Тыгайым ышташ тынар кугу чытыш кӱлеш! Санденак ятырыштым сайынак савыркален-пӱтыркаленак ончышым. А тыгай кумылжо мыйын веле огыл ыле, коеш – Надежда дене мыняр жап мутланен шогышна, тиде гутлаште воктекыже еҥ-влак эреак лишемыч.
– Сӧрастарыш-влакым кунам ышташ тӱҥалынам – омат шарне. Шым ий але тылеч утларак жап лиеш. Мый ешем дене У Торъял поселкышто илем. Пашам музыкальный школышто ыштем – йоча-шамычым баяным шокташ туныктем. Шарнем, ачам, Федор Сергеевич Сидоркин, шке жапыштыже Кугу Лумарий тӱвыра пӧртыштӧ кумдан чапланыше «Шӱшпык» калык семӱзгар образцовый оркестрым шкежак чумырен да вуйлатен, тудат ты коллективын участникше-шамычлан – йоча-влаклан – тыгай сӧрастарыш-влакымак: пылышкӧржым, шиянӱштым, оҥышсакашым, вес семын ойлаш гын, шийдарманым пӱтынек ышта ыле. Кокланже пелйӱд эртымешкат шинчылтын, – палдарыш уста еҥ.
Тыге тиде кумылжо да, очыни, мастарлыкшат шке шочшыжланат, Надеждалан, куснен.
– Кастене, поснак телым, паша гыч толат да пешыже мом ыштет? Санденак мыят ачам семынак тидым я тудым келыштараш тыршем. А тылеч ончыч эше сӱретленамат, ургенамат, пидынамат, сортамат ыштеденам. Мом лиеш, чыла ыштен ончымемла чучеш.
Пылышкӧржым тӱҥалтыште шканем ыштен ончымем шуын. Ыштенам. Моторын лекмыла чучын. Вара браслетым ыштышым. Тудат чонемлан келшыш. Тыге чылажымат тӱрлӧ сынаным ышташ тӱҥальым. Кидпашам шуко погынен да ынде еҥ-влаклан темлаш мероприятийлашке лектедем, – рашемдыш Надежда Федоровна.
«Ончыкыжым эше мом ыштынеда?» йодмемлан тыгерак вашештыш:
– Мом ышташ лийме шотышто вуйыштем, паледа, тунар шуко шонымаш уло! Сандене лачшымак кудыжым ойлаш, тӱҥалтыште мом ыштен ончышаш нерген кызытеш рашыже каласенат ом керт.
Кидпаша нерген веле огыл ойлаш гын, мый, мутлан, путешествийыш кошташ йӧратем. Тӱрлӧ верлашке шуэн огыл миен толам. Тыгак фотографийым ышташ моткоч келша. Ончыкыжым тиде пашам сайынрак шукташ тунемнем.
Мом ойлаш? Тек чыла шонымашыжат шукталтеш манме гына шуэш.
Любовь Камалетдинова
Авторын фотожо
