1 июльышто Марий Элым вуйлатыше Юрий Зайцев Калык-влакын келшымаш пӧртыштышт боевой действий-шамычын ветеранышт дене вашлийын.
Тылеч ончыч «Геройын ватыже. Геройын аваже» фотовыставкым ончен. Тушто республикысе 40 утла ӱдырамаш участвоватлен.
Ончерыш Военнослужащий-влаклан полшымо «Звезда и Лира» мер фондын исполнительный директоржо Екатерина Колотовкина толын. Лач тудо 2022 ийыште фотопроектлан тӱҥалтышым ыштен. Мутшо почеш, акцийыш 70 утла регион ушнен.
«Шуко ава ден вате лишыл еҥыштым вучен шуктен огытыл. Ме тендан дене пырля ойгырена. Мыланна нуно герой улыт. Сарзыда-шамычлан келшен толмыдам тек уло тӱня пала. Президентнан ме улына, а ме – тиде Россий. Ме садак сеҥена», – манын Е.Колотовкина.
«Геройын ватыже. Геройын аваже» фотопроектын республикысе организаторжо Елена Чемоданова регионым вуйлатышылан тиде всероссийский акцийым Марий Элыште эртараш полшымыжлан тауштен.
«Сарзе-влакын ватышт ден авашт марийышт да эргышт гаяк герой улыт. Фотопроект ӱдырамашын лӱддымылык да кӧргӧ вий символжым, пӧръеҥ ответственностьын нелытшым шке вачӱмбакыже пыштымыжым да тудым ӱмыржӧ мучко нумалаш ямде улмыжым ончыкта», – палемден Ю.Зайцев.
Боевой действий-влакын ветеранышт дене йыргешке ӱстел йыр мутланымыж годым Ю.Зайцев погынышо-шамычым пайрем дене саламлен да тиде кечын Россий верч кредалше, элнан чапшым саргурал дене аралыше-влакым ушымыжым палемден.
«Чылаландат лӱддымылыкым, патырлыкым да патриотизмым ончыктымыланда тауштем. Мый военный айдеме улам, Российын кушто, кунам, могай конфликтлаште участвоватлымыжым сайын палем. Те шӱм-чондан йодмыж почеш служитлаш каенда да ончыланда шындыме боевой задаче-влакым сайын шуктенда», – палемден республикым вуйлатыше.
Вашлиймаште ветеран организаций-шамычын пашашт, военнослужащий-влакын да нунын ешыштын льготан обеспеченийышт, ешартыш шинчымашым налме йӧн, сарзе-влакым тойымо вер дене кылдалтше йодышлам каҥашеныт.
Мероприятий мучаште Ю.Зайцев награде ден удостоверений-влакым кучыктен.
Марий Эл Республик вуйлатышын таумутшым «Десантник-влакын ушемышт» Регион-влак кокласе мер организацийын Марий регионысо пӧлкажын йыжыҥъеҥже-шамыч Евгений Костромичевлан, Роман Медведевлан да Николай Надежкинлан увертарыме.
«Боевой действийын ветеранже» удостоверенийым СВО-н участникше-шамыч Александр Архипов, Андрей Изикеев, Андрей Ситников да Альфир Мустафин налыныт.
Тылеч вара Ю.Зайцев тиде кечынак пашам ышташ тӱҥалше регионысо «Элым аралыше-влак» кугыжаныш фондыш миен коштын. Тушто психолог ден юрист-шамычын кабинетыштым, библиотекым, йоча пӧлемым, конференц-залым да моло помещенийым ончен, пашаеҥ-влак дене мутланен.
Республикым вуйлатышын палемдымыж почеш, филиалын пашажым кугу кӱкшытыштӧ организоватлыме.
«Тыште кӱлешан чыла службо пашам ышта, нуно специальный военный операцийым эртарыме кумдык гыч пӧртылшӧ ветеранна-влаклан правашт ден йӧныштым рашемдаш кӱлеш лийын кертыт. Полышым пуымо веле огыл, тыгак социальный ден психологический реабилитацийым эртарыме пашат куандара», – шонымашыжым каласен Ю.Зайцев.
Республикна Юл кундем федерал округысо регион-влак коклаште спецоперацийын участникше-шамычлан полшымо шотышто ик эн ончылно кая, палемден Марий Элым вуйлатыше.
Марий Эл Республикым вуйлатышын администрацийжын информаций паша пӧлкажын уверже негызеш М.ИВАНОВА ямдылен
