Олтымо пагыт шуын. Пачерыштыда шокшо мо?
Марий Эл вуйлатыше Юрий Зайцев ден «Т Плюс» ПАО-н генеральный директоржо Андрей Вагнер, тудо мемнан регионыш паша дене толын, 7 октябрьыште республикын стратегически кӱлешанлан шотлалтше Йошкар-Оласе ТЭЦ-1 да ТЭЦ-2 предприятийлаште лийыныт.
Ончен коштмышт годым нуно кок предприятийжынат вий-куатшым, шокшым пуымо жаплан ямде улмыштым да трукышто аварий лийме годым нелылыкым кораҥдаш ӱшанле улмыштым акленыт.
Йошкар-Оласе ТЭЦ-1 коммунальный энергетикын кызытсе илышын йодмыжлан келыштаралтше кугу предприятий. Тудын радамыштыже шокшым пуышо 30 котельный, 22 тӱҥ тепловой пункт да шокшым пуышо 217 км кутышан сеть пурат. Шокшым ситарыме паша деч посна предприятий электроэнергийымат пуымо сомылымат шукта. Тидын нерген ТЭЦ-1 директоржо Игорь Бондарчук каласкален.
Юрий Зайцев ден Андрей Вагнер оласе подстанцийым, химический да котельный цех-влакым, диспетчер службым, электросеть цехым ончен савырненыт. Предприятий вуйлатышын мутшо почеш, шокшым пуымо процессым пытартыш ийлаште автоматизироватлыме. Иктаж-мо локтылалтме годым резерв источникым ушат да лӱдыкшым пеш писын кораҥдат.
Пытартыш жапыште предприятийыште ЖКХ-м реформироватлаш полшышо Фонд дене иквереш 2023 ийлан шокшым пуышо сферыште источникым да тепловой сеть-влакым модернизироватлыме шотышто инвестиционный программым ыштыме. Акше – 255 млн. теҥге. Тылеч посна 2024 ий марте электроэнергетике сферыште 478 млн. теҥгеаш инвестиционный программе шукталтеш.
Директорынак мутшо почеш, 79 ий ончыч почмо предприятийыште 1400 еҥ тырша. ТЭЦ-1 чылаже шуко пачеран 1281пӧртыш, 97 образований, тазалык аралтыш 59 учрежденийлашке да 657 моло верлашке шокшым пуа.
Йошкар-Оласе ТЭЦ-2 предприятийыште лиймышт годым Марий Эл вуйлатыше ден «Т Плюс» ПАО-н гендиректоржылан машинный залым, котельныйым да турбинный отделенийым, тӱҥ щитовой управлений пунктым ончыктеныт. Технический директор–тӱҥ инженер Александр Фадеевын каласкалымыж почеш, шокшым пуышо сетьым да источникым уэмдаш «Т Плюс» ПАО 180 млн. теҥгем ойырен. Ты окса кӱшеш Йошкар-Оласе инфраструктурым телылан ямдылыме да олаште илыше-влаклан жапыштыже шокшым пуымо. 2023 ийыште «Т Плюс» ТЭЦ-2 эн кӱлешанлан шотлалтше оборудованийым кок гана капитально олмыкта, 1 км кутышышто пучым вашталта.
Вара Марий Эл вуйлатыше да ПАО-н генеральный директоржо ончыкылык ыштышаш паша нерген каҥашеныт. «Т Плюсын» улшо йӧнжӧ-влакым да вий-куатшым ужмек, сай шонымаш шочеш. Коеш, паша кая, объект-влак олмыкталтыт. Тидыже модернизаций, инвестиций вияҥме нерген ойла, тугеже паша умбакыжат вораҥеш манын ӱшанаш лиеш», – каласен Юрий Зайцев.
«Т Плюс» ПАО-н генеральный директоржо палемден: энергетике йодышым иквереш решатлымаш илыме да коммунал сферылан да экономикын моло отрасльжылан вияҥашышт полша. «Социальный сфере, кушто ме пашам ыштена, кажне регионлан келшен толеш, ты шотышто Марий Элат ӧрдыжеш ок код. Пашам пырля ыштымаш пеш кӱлешан», – каласен Андрей Вагнер.
ххх
Тиде кечынак Марий Эл вуйлатыше Юрий Зайцев шокшым пуышо объект-влакын шыже-теле пагытлан кузе ямдылалтмышт да олтымо сезоным кузе эртарен колтымо йодыш дене совещанийым эртарен. Тушто «Т Плюс» ПАО-н генеральный директоржо Андрей Вагнер лийын.
Йошкар-Оласе ТЭЦ-1 директор Игорь Бондарчук шке докладыштыже гидравлический испытаний нерген ойлен: «Тений тыгай тергымашым у схеме почеш эртаренна. Тудым мый чынлан шотлем. Ола кок ужашлан пайлалтеш, олмыктымо паша але испытаний кайыме годым еҥ-влак йӧндымылыкым огыт шиж». Йошкар-Олан мэрже Евгений Маслов рӱдоласе пачерлам ырыктыме схемым тӱҥ программылан шотлалтмым палемден.
«Т Плюс» ПАО «Марий Эл да Чуваший» филиалын директоржо Сергей Ушаков компанийын пашаже нерген каласкален. Ты предприятий тачысе кечын 358 илыме пӧртым, 54 коммерций да социальный сферысе 47 объект-влакым обслуживатла. Балансыште 33 км магистраль да распределитель сеть-влак шотлалтыт. Шокшым пуымо жаплан палемдыме чыла мероприятийым шуктымо.
Марий Эл Республикым вуйлатышын организаций да аналитике виктемжын уверже негызеш Л.СЕМЕНОВА ямдылен
Д.РЕЧКИНЫН фотожо
