8 октябрьыште марий парламентыш паша визит дене Киров областьын Законым лукшо Погынжын делегацийже толын.
Кок спикерын вашлийын мутланаш тӱҥалмышт деч ончыч пошкудо кундемысе закорганын вуйлатышыже Роман Береснев коллегыже Михаил Васютиным Марий Эл Кугыжаныш Погынын председательжылан сайлыме дене саламлен да законым ямдылен лукмо пашаште чапле лектышыш шуаш тыланен.
Марий Элын да Киров областьын парламентыштын председательже-шамыч пошкудо регионлаште пӱсын шогышо йодыш-влакым пырля решатлыме да законым ямдылен лукмо у тӱҥалтышлан йӧным ыштыме нерген мутланеныт. Шонымышт почеш, эн ончычак вийыште улшо Парламент-влак кокласе паша нерген келшыкым кызытсе жаплан келыштарен уэмдаш кӱлеш.
Кумдаҥдыме заседанийыште Марий Эл Кугыжаныш Погынын председательжын икымше алмаштышыже Лариса Яковлева ден регионласе закорган-влакын представительышт парламент-шамычын у паша формышт нерген мутланеныт.
Р.Береснев киров парламентын пашашкыже кызытсе жаплан келшыше увер технологийым шыҥдарыме опыт дене палдарен, сентябрьыште Юл кундем федерал округысо Законодатель-влакын ассоциацийыштын заседанийжым организоватлыме да эртарен колтымо нерген каласкален, коллегыже-шамычым Кировыш пагален ӱжын.
М.Васютин вашкылын форматшым кумдаҥдаш кӱлмым палемден. Мутшо почеш, тиде пошкудо регионышто лекше пӱсӧ йодыш-влакым лачшымак кузе решатлымым, пеҥгыдемдыме закон-шамычым илышыш кузерак пуртымым пален налаш веле огыл, тыгак федерал кӱкшытыш лукташ келшыше тӱҥалтышым пырля ямдылаш йӧным ышта.
Специальный военный операцийлан полшымо, регион-влак кокласе чек кундемыште верланыше илемлашке канде тулым пуртымо, Йошкар-Ола-Киров да Киров-Йошкар-Ола сообщений дене кӱртньыгорно транспортым колтымо да моло йодышат вашлиймашыш толшо-шамычын тӱткышышт деч посна кодын огытыл.
Марий Эл Кугыжаныш Погынын председательже М.Васютин уна-влаклан Йошкар-Олаште шукерте огыл почмо у каныме верым – Марий паркым – ончыктен, вара коллегыже-влакым регионын Мер полыш штабышкыже наҥгаен. Тудын пашаж дене «Единый Россий» партийын регионысо исполкомжым вуйлатыше Антон Волков ден штабым вуйлатыше, Кугыжаныш Погынын депутатше Даниил Жуков радамын палдареныт.
Тиде кечынак регионласе закорган-влакым вуйлатыше-шамыч М.Васютин ден Р.Береснев Марий Эл Молодёжный парламентын еҥже-влак дене вашлийыныт да «иктӧр» форматыште мутланеныт.
Вашлиймашым иктешлыме годым М.Васютин Р.Береснев ден тудын коллегыже-влаклан Марий Элыш толмыштлан тауштен да шуко задачым, ты шотыштак специальный военный операцийыште участвоватлыше сарзе-шамыч ден нунын ешыштлан тӱрлӧ семын полшымо, национальный проект-влакым илышыш пуртымо йодышлам, решатлымашке виктаралтше пашаште опыт дене пайлалтме йӧнын кӱлешлыкшым палемден.
Р.Береснев эн ончычак шукташ кӱлмӧ паша радамыште демографий дене кылдалтше задачым – еш-влаклан закон почеш полшаш кӱлмӧ у механизм-влакым кычалме корным – палемден. Спикерын шонымыж почеш, самырык-влак дене пашам ышташ тӱҥалаш кӱлеш, вет тудо – мемнан ончыкылыкна веле огыл, а тачысе тукымна.
Парламентым вуйлатыше-влак вашкылым пеҥгыдемдаш кутырен келшеныт да ончыкылык паша радамыш Марий Эл Кугыжаныш Погынын да Киров областьыште Законым лукшо Погынын депутатыштын иквереш эртарыме мероприятийыштым пуртеныт.
Маргарита ИВАНОВА
М.Иванован фотожо/ «Марий Эл» увер агентстве
