Тений 23 апрельыште Морко районышто илыше-влак Марий Элын Кугыжаныш Погынышкыжо депутатым сайлаш тӱҥалыт.
Тидланак пӧлеклалтын ыле шочмын республикын Рӱдӧ сайлымаш комиссийыштыже эртыше брифинг.
Председатель Ирина Татаринован (снимкыште) палдарымыж почеш, 24 январьыште Марий Элын шымше созыв Кугыжаныш Погынжын 33-шо №-ан ик мандатан Луговой избирательный округышто депутатым ешарен сайлымаш увертаралтын. Тиде округыш Морко район тӱрыс огыл, а икмыняр кундемже: Зеленогорск, Кокласола, Красный Стекловар, Октябрьский, Волаксола, Семисола, Шеҥше, Унчо ял шотан илем-влак – пурат.
Кугыжаныш Погын депутатыш кандидат-влак самовыдвиженецат лийын, тыгак сайлымашыш ушнаш праван политический партий-влакат темлен кертыт. Кандидат-влакым темлыме жап 25 январь гыч 23 февраль марте шуйна. А 6 февраль гыч нуно регистрацийым эрташ тӱҥал кертыт. Тудо, мо оҥайже, тыгак вес пайрем кече, 8 Март марте, эрта.
Ешартыш сайлымаш молан 23 апрельлан палемдалтын? Ирина Татаринован рашемдымыж почеш, тиде округ деч кандидатын полномочийже кодшо ийын 30 июньышто пытен, сандене, закон дене келшышын, ӱмаште сентябрьыште эртыше единый йӱклымӧ кечын сайлымашым палемдаш огеш лий улмаш.
Любовь Камалетдинова
Авторын фотожо
