Йошкар-Олашке 40 у автобусым кондымо. Ушештарена: пытартыш кум ий жапыште «Троллейбус транспорт» муниципальный предприятий 10 у троллейбуслан, 90 у автобуслан ешаралтын. Эше 5 у троллейбусым вучена.
Марий Эл вуйлатыше Юрий Зайцев теҥгече «ПАЗ» маркан автобус-шамычын сравочыштым кучыктен. У автобус-влак лишыл жапыште ола уремлаште да районлашке кудалышташ тӱҥалыт.
«Частник-шамыч графикым огыт ончо, остановкым чарныде кудал эртат. Тиде йодыш дене ятыр вуйшиймаш пура. Эсогыл Федераций Советын председательже Валентина Матвиенко палемден. Тиде йӧрдымӧ койышым кораҥдаш манын ме у техникым налына», – каласен Ю.Зайцев.
Йошкар-Олан мэрже Евгений Маслов олан эн пӱсӧ йодмашыжым кӱчык жапыште шуктымылан Юрий Зайцевлан, тыгак республикын правительствыжлан, регионын Минтрансшылан тауштен. Палемден, оласе калык у автобус-влак нерген сайым гына ойлат.
Посна тауштыме мутым мэр троллейбус паркын пашаеҥже-влакын лӱмышт дене ойлен, вет ты предприятий тымарте эре шеҥгелне шӱдырнен, а кызыт койынак вияҥеш, калыкым троллейбус дене веле огыл, автобус денат шупшыкта.
У подвижной составым налме дене 100 паша вер почылтеш, пашаш официально налыт, социальный кӱлешан верлашке шонымо семын писынрак миен шуаш лиеш, единый проездной билетым кучылташ йӧн лектеш.
Автобус-влак чылан канде тӱсан улыт, 55 еҥ пура, видеоэскерымаш, кондиционер уло, мыняр пассажир пурымо-лекмым, мыняр еҥ тӱлымым шотлышо системым вераҥдыме.
Л.СЕМЕНОВА
Д.РЕЧКИНЫН фотожо
