Звенигово район Красногорский посёлкын Центральный уремыштыже чоҥен шындыме 92 пачеран у пӧртыш 102 еҥ илаш пура. Нуно Провой кундемысе аварийныйлан шотлалтше 22 пӧртыштӧ иленыт.
1133,71 кв.м кумдык гыч вес вере илаш кусареныт гын, 1454,1 кв.метрым ойырымо.
Марий Эл вуйлатыше пӧртсий дене саламлаш толын да пиалан-влаклан сравочым кучыктен.
«Те тиде татым шуко жап вученда. У пачерым налмаш – эреак пайрем. Тек тендан пӧртыштыда йӧнан, шокшо да куанле лиеш», – тыланен Юрий Зайцев.
Палемден, аварий лийын кертме лӱдыкшан пӧртла гыч граждан-влакым вес илыме верыш кусарыме программе график дене келшышын шукталт толеш. 2019-2022 ийлаште 5219 еҥлан пачерым ойырымо, тошто пӧртлаште 78,3 тӱжем квадрат метрым кораҥдыме. Тений республикысе 11 олала ден районлаште шуко пачеран 13пӧртым чоҥен шукташ палемдыме.
Республик вуйлатыше икмыняр пачерым ончалын савырнен, еҥ-влакым илаш пурташ лиймым палемден. Пачерлаште чыла ямде, пӧрт йыр кумдыкым тӱзатыме.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
