УВЕР ЙОГЫН

Суд кучемыште – у вуйлатыше

 

Антон Остроумов Марий Элын Верховный судшын председательже должностьышко шогалын.

У вуйлатыше дене Юрий Зайцевым Россий Федерацийын Верховный судшын председательжын алмаштышыже Николай Тимошин официально палымым ыштен.

Марий Эл вуйлатыше регионлан судын кӱлешлыкшым палемден да  Антон Остроумовлан пашаштыже сеҥымашым тыланен.

– Мемнан дене судебный кучем моло кучем коклаште достойный верым айла, еҥ-влакын праваштым да эрыкыштым, обществым социальный конфликт деч арала. Тӱрлӧ кӱкшытан кучем орган-влак дене ваш келшен пашам ыштен, кугу да кӱлешан пашажым умбакыжат шуя. Тыге граждан-влакын ӱшаныштым сула. Президентна могай задачым шында, ме тудым иквереш илышыш пурташ тӱҥалына, – ойлен Юрий Зайцев.

Николай Тимошин палемден: Антон Остроумовлан элнан поян историян да экономически кушмаште кугу вий-куатан субъектше-влак кокла гыч иктыжын тӱҥ судебный органжым вуйлаташ ӱшаныме.

– Антон Борисовичын вуйлатымыж дене регионышто суд у семын вияҥаш тӱҥалеш да еҥ-влакын ӱшаныштым пеҥгыдемда манын ӱшанем, – каласен   Николай Тимошин.

Антон Остроумов 1971 ийыште Новосибирскыште шочын, Томскысо кугыжаныш университетыште «Юриспруденций» специальностьым налын. Паша корныжым шочмо олаштыже тӱҥалын, районный да  областной кӱкшытан судлаште ыштен. 2017 ий гыч Новгородский областной судын председательжын алмаштышыжлан тыршен. Юридический профессийыште паша стажше – 31 ий утла, судья должностьышто – 23 ий утла. У должностьыш 6 ийлан шогалтыме нерген указым Росиийын президентше 2026 ий 12 октябрьыште подписатлен.

– Правосудийлан служитлаш пуымо присяге почеш, законын нормыжлан да Россий Федерацийын Верховный судшын практикыжлан эҥертен, Судебный этике кодексын йодмашыжым шуктен, еҥ-влакын, организацийлан, республикын да тӱрыс налмаште кугыжанышын праваштым аралаш манын,  тӱрлӧ категорий делам умбакыжат писын да сай качестван кугу кӱкшытыштӧ ончаш тӱҥалына, – палемден Антон Остроумов.

Марий Элым вуйлатышын пресс-службыжын уверже негызеш Любовь Камалетдинова ямдылен

 

Добавить комментарий