Волжск оласе 3-шо №-ан школышто «Водительлан тыланамаш серыш» конкурс эртен. Тушто тӱҥалтыш класслаште тунемше ӱдыр-рвезе-шамыч участвоватленыт.
Серышым эн сайын возышо 10 школьник госавтоинспектор, «ЮИД» отрядын да Шке кумыл калык дружинын участникше-шамыч дене пырля школ воктенысе кугорныш, корныеҥ куснымо верыш, профилактике шотан акцийыш лектын да водитель-влаклан тыланымашан шке серышыжым кучыктен.
Конкурсышто участвоватлыше кажне ӱдыр-рвезылан Волжск оласе Госавтоинспекций «Самырык корныеҥлан шарнашыже» сӧрал блокнотым кучыктен. Акцийыш ушнышо школымат грамот дене палемден.
А водитель-влак тыгай акцийыш логалмыштлан изишак ӧрмалгеныт гынат, кажныже серышым куанен, тауштен налын да корнышто тӱткӧ лияш сӧрен.
М.ИВАНОВА.