28 январьыште лекше газетыштына шуко еҥын вирусан инфекций дене черланымыжлан кöра Йошкар-Оласе поликлиникылаште врач деке логалаш пеш кугу черет лийме нерген возенна ыле. Марий Элын тазалык аралтыш министржын алмаштышыже Татьяна Бастракован ÿшандарымыж почеш, тиде арня тÿҥалтышлан ситыдымашым кораҥдыме.
– Марий Элын тазалык аралтыш системыже омикронын регионышкына толын шуын кертмыжлан ончылгоч ямдылалтын, сандене шуко еҥын иканаште черланымыжлан кöра лекше тöрсырым пел кечыште гаяк тöрлатен, поликлинике-влакын паша радамыштым пужен ыштен. Рашемденрак каласаш гын, медицине пашаеҥ-влакын тÿҥ вийыштым фильтрлашке да черле-шамычым мöҥгыштö обслуживатлымашке виктарен, – палемден Т.Бастракова.
Эртыше арня тÿҥалтыште оласе чыла поликлиникыште аҥысыр специальностян врач-влакын приёмыштым чарен шогалтыме. Фильтр-шамычын пашаштым вияҥдыме, пурымо да лекме посна омса-влакым почмо деч посна у коронавирус инфекциян пациент-шамычым дистанционно эскераш тÿҥалме.
– Черле-шамыч кечын шукемыт, сандене врач-влак кажныж деке миен огыт шукто. Россий Федераций Тазалык аралтыш министерствын кÿштыкшö дене келшышын, поликлинике-шамычын колл-рÿдерлаштышт, пациент деке телефон дене йыҥгыртен, лÿмын ямдылыме чек-лист почеш йодыштмо пашам организоватлыме. Результат почеш черле умбакыже эмлалтеш але тудын деке врач, «вашкеполыш» толыт. Поликлиникын пашажлан тидат моткоч сайын полша, – манеш министрын алмаштышыже.
Чыла тиде ситуацийым кÿчык жапыште контрольыш налаш йöным ыштен.
М.ИВАНОВА
