Марий Элын прокуроржо Сергей Беляков кушкыжмын, 28 августышто, республикысе савыктыме изданий-влакын тӱҥ редакторышт, теле- да радиовещательный компаний-влакын вуйлатышышт дене паша вашлиймашым эртарен.
Тиде вашлиймаште «Марий Эл» газетнан тӱҥ редакторжо Александр Абдуловат лийын.
Прокуратур орган-влакын СМИ дене келшен пашам ыштымышт айдемын да гражданинын праваштым да эрыкыштым аралыме шотышто йодыш-влакым рашемдаш полша. Прокурор-влак ончылан шындыме задачым нуно СМИ деч посна илышыш пуртенат огыт керт, палемда ведомствын пресс-службыжо.
Вашлиймаште прокуратур ончылно шогышо задаче-влак, осал пашам, преступленийым ыштыме ваштареш кучедалме, моло дене кылдалтше йодыш-влак нерген мутланеныт. Тӱшка увер средства-влакын еҥышт тыгак тӱрлӧ йодышым пуэныт. Мутлан: кӧ тыгай прокурор; тудын деке приемыш кузе логалаш лиеш; самырык прокурор-влак – тиде кӧ улыт; уголовный судопроизводствышто суд деч ончыч гражданинын праважым аралымаш кузе шукталтеш да молат. Тыгак республикын прокуроржо регионышто улшо ситуацийлан шке акшым пуэн, йодыш-влакланат вашештен. Нуно, мутлан, ГСМ-лан ак, законым пудыртымым рашемдымеке, прокуратурын могай мерым приниматлымыж нерген лийыныт.
Вашлиймаште вашкылым ыштыме у йӧн-влакымат каҥашеныт. Нуно ончыкыжым республикысе прокурор-влаклан шукырак калыкым авалташ, прокуратурын чапшым нӧлталаш да еҥ-влакын права шотышто шинчымашыштым ешараш полшышаш улыт.
Л.Камалетдинова.
