«Экологий» национальный проект дене келшышын, Марий Элыште «Ойыртемалтше вӱд объект-влакым арален кодымаш» региональный проект илышыш шыҥдаралтеш.
Республикын Пӱртӱс поянлык, экологий да йырым-йырысе средам аралыме шотышто министерствыже ты проект дене келшышын, ятыр кӱлешан пашам вораҥдарен колташ палемден. Мутлан, Оршанке районысо Изи Кугунур ял воктенысе Ошла эҥерын вӱд корныжым эрыктыман. Ты пашалан федеральный бюджет гыч 2022, 2023 ийлаште тӱрысшӧ 40 миллион теҥге пурышаш. Сметный документацийым 2020-2021 ийлаште ямдылен шуктыман. Тидлан тыгак федеральный бюджет гыч 6 миллион теҥгем ойырат.
Тыгак Медведево районышто йоген кайыше Нолька эҥерым да сержым эрыкташ палемдыме. Вӱдшым эрыкташ 2023 ийыште федеральный бюджет гыч 18,620 тӱжем теҥгем, а республикын бюджетше гыч 380 тӱжем теҥгем ойыраш палемдыме. Сержым тор да тӱрлӧ кушкыл деч эрыкташ да тӱзаташ манын, волонтёр-влакым ушаш палемдыме.
Региональный проектым илышыш шыҥдарышашлан тӱрысшӧ 65 миллион теҥгем кучылташ палемдыме. Тышеч 64620 тӱжем теҥгеже федерал бюджет гыч, 380 тӱжем теҥгеже республикысе бюджет гыч лийшаш. Чылажат вӱд объект-шамычын экологий состоянийыштым, ту кундемысе калыкын, вӱдысӧ биоресурсын илыш условийыштым саемдаш шонымаш дене ышталтшаш. Проект дене кылдалтше пашам вес ийын тӱҥалшаш улыт. А тений ты шотышто Марий Эл Республик ден Российысе Пӱртӱс поянлык министерстве дене ойпидышым ыштен. Кӱлеш документым апрельыште Вӱд ресурс федеральный агентствыш согласованийыш колтымо. Кызытеш тушто чыла темлымашым ончен, аклен лектын, иктешлымашым иктат.
С.НОСОВА.
