Кажне ийын октябрьын кумшо рушарнянже Корно озанлык пашаеҥын кечыже палемдалтеш.
Тидын вашеш Эрик Сапаев лӱмеш марий кугыжаныш академический опер да балет театрыште торжественный мероприятий эртен. Тушто Марий Эл вуйлатыше Юрий Зайцев лийын.
– Корным чоҥышо-влакын пашашт кугу чап дене пайдалана да кӱкшын аклалтеш. Тендан кузе тыршымыда дене производствын чыла отрасльжын да общественный инфраструктурын вияҥмышт кылдалтеш. Корнын могай улмыжо регионыш мыняр инвестиций оксам утларак кондаш, пассажир транспортлан кӱрылтыш деч посна пашам ышташ полша. Тыланда кӧра кажне айдемын илышыжлан сай условий ышталтеш, – каласен регион вуйлатыше.
Тудо палемден: шуко ышталтын, но эше шукырак ыштыман. Корно озанлык пашаеҥ-влак умбакыжат профессионал семын тыршаш тӱҥалыт гын, рӱдолаште да районлаште илыше-шамыч вашталтышым лишыл жапыштак ужыт.
– Ойырен налме пашалан ӱшанле лийын кодмыланда тау. Мый тыланда пеҥгыде тазалыкым, оҥай проект-влакым да у задаче ден планым илышыш келшен толшын пурташ тыланем, – ешарен Марий Эл вуйлатыше.
Тылеч вара ойыртемалтше пашаеҥ-влаклан тӱрлӧ кӱкшытан наградым кучыктеныт.
Мероприятий жапыште Юрий Зайцев корно озанлык предприятий-влакын отрасльыште шумо кӱкшытышт дене палдарыше выставкым ончен савырнен.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен.
