18 июльышто Марий Эл вуйлатыше шуко шочшан еш-влаклан «Родительская слава» орденын медальжым да «За достойное воспитание детей» почётан знак-влакым кучыктен.
Марий Эл вуйлатыше Юрий Зайцев торжественный церемонийыш погынышо-влакым ача-аван обязанностьшым шуктымыштлан да элнан ушан-шотан гражданинже-влакым ончен куштымыштлан тауштен. Родной да лишыл еҥ-влак илышым тичмашым ыштат, пиалым да куаным умылаш, чыла неле-йӧсым сеҥаш полшат, палемден тудо.
«Еш шӱм-чон поянлыкым, йӱлам да тукым кокласе кылым арален кодаш полша, обществын пеҥгыде улмыжым да вияҥмыжым ончыкта. Ешыште кушкын толшо тукымын койыш-шоктышыжо, илыш-йӱлаже да принципше-влак вийныктаралтыт», – каласен Юрий Зайцев.
Россий президент Владимир Путинын «еш-влаклан полышым ойырымаш кугыжанышын эн кӱлешан задачыжлан да элын ончыкылыкшо верч ыштыме пашалан шотлалтеш» манмыжым ушештарен да ешарен: республикын правительстыжат еш институтым пеҥгыдемдымашым, тудым социально аралымашым, демогарфийым саемдаш тӱрлӧ йӧным ыштымашым тӱҥ пашалан шотла.
Марий Эл вуйлатыше «Родительская слава» орденын медальжым Шуталевмыт ешлан кучыктен. Вате-марий Александр Геннадьевич ден Светлана Александровна Марий Турек посёлкышто илат, 7 йочам ончен куштат. Нуно кажне икшывыштым чыла шотыштат тӱрлӧ велым вияҥдат да нунын сеҥымашышт дене кугешнат.
«За достойное воспитание детей» почётан знак дене Медведево район Нурма села гыч Дмитриевмыт, Килемар район Нежныр гыч Кропиновмыт, Волжский район Мучашъер гыч Кудрявцевмыт, Йошкар-Ола гыч Сараевмыт да Морко посёлко гыч Федоровмыт еш-влак палемдалтыныт.
«Тыгай кӱлешан да чоным тарватыше сомылым уло кумылем дене шуктышым. Тыланда таумутым каласынем. Те шочшыда-влаклан шӱм-чон поянлыкым пуэда, йӧратымаш да нунын верч тыршымашда дене авалтеда, тыге элнан патриотшо-влакым куштеда», – мучашлен каласен Юрий Зайцев.
Марий Эл Республикым вуйлатышын администрацийжын
информаций паша пӧлкажын уверже негызеш
Л.СЕМЕНОВА ямдылен.
Д.Речкинын фотожо