КУЧЕМЫШТЕ

«Вес семын огына керт»

Марий Элым вуйлатыше Юрий Зайцев специальный военный операцийыште сусыргышо военнослужащий-влак дене вашлийын.

Регионым вуйлатышын кӱштымыж почеш «Кичиер» санаторийыште СВО-што сусыргышо военнослужащий-влаклан тазалыкым пеҥгыдемдыме сменым ыштыме. Тыште 12-шо гыч 25-ше январь марте спецоперацийын 20 участникше реабилитацийым эртен.

24 январьыште нунын деке патырлыкыштлан таушташ, вашла мутланаш, йодышышт ден проблемыштым шкешт дечак колаш Ю.Зайцев миен.

«Ме, тазалыкдам шотыш кондыза манын, мом кертмынам ыштышаш улына. Тендан ешда, йочада-влак улыт, вес семын ме просто огына керт. Тыланда тыште келшыш, каныш ден эмлыме процедур-влак пайдале лийыныт манын ӱшанем», – пӧръеҥ-влак дене мутланымыж годым манын Юрий Викторович.

Военнослужащий-влак Марий Элым вуйлатышылан тазалыкым пеҥгыдемдыме сменым организоватлымыжлан, ешышт дене кылдалтше пӱсӧ йодышлам рашемдаш полшымыжлан тауштеныт.

«Чыла тиде мыланна моткоч кӱлеш… Тыланда да республикын правительствыжлан кугу тау», – каныше-влак кокла гыч манын иктыже.

Ю.Зайцев каныше да тазалыкым пеҥгыдемдыше-влакын илыме йӧныштым, тӧнежын материально-технический базыжым, эмлыме отделений-влакым ончен савырнен, медперсонал дене палемдыме эмлыме корным да санаторийын кӱлешлыкшым каҥашен.

Санаторийын пашаеҥже-влак Марий Элым вуйлатышылан военнослужащий-шамычын канышышт нерген каласкаленыт, тыгодым кажне еҥлан тудлан гына келшыше процедурым ойырен налме, чыла шотыштат пайдале кочкышым кечыште вич гана пукшымо нерген ойленыт.

Тылеч вара Ю.Зайцев военнослужащий-влак дене вашлийын, могай полыш кӱлмӧ нерген йодыштын. Еш, спецоперацийыште участвоватлыше-влак дене кылдалтше тӱрлӧ йодышым нуно пырля каҥашеныт. Вашмутланымаш пайдалын эртен, шуко йодышлан вашмутым налаш йӧн лийын. Военнослужащий-шамыч Юрий Зайцевлан нунын деке толмыжлан, нунын верч тургыжланымыжлан тауштеныт.

Марий Эл Републикым вуйлатышын администрацийжын информаций паша пӧлкажын уверже негызеш М.ИВАНОВА ямдылен   

 

 

Опубликовать в Одноклассники

Добавить комментарий