Марий Эл вуйлатыше Юрий Зайцев Россий чоҥымаш да илыме вер ден коммунал озанлык министр Ирек Файзуллин дене вашлийын.
Социально кӱлешан объект-влакым чоҥымо да пужен ыштыме, илыме вер ден коммунал комплексым уэмдыме йодыш-влакым решатлымаште эреак полшен шогымылан Марий Эл вуйлатыше РФ Минстрой вуйлатышылан тауштен ойлен.
Юрий Зайцевын мутшо почеш, регионысо сай вашталтыш-влак РФ президент Владимир Путинын темлыме национальный проект-влаклан да республикын социально-экономический вияҥмаш посна программыжлан кӧра ышталтыт.
«Национальный проект-влакым шыҥдарыме кышкарысе мероприятийлам ме графикым ончылтен шуктен толына. Ончык кайымаш пеш кӱлешан, но тидын годымак федеральный программыш пурыдымо объект-влак нергенат мондыман огыл, нунат республикыште илыше-влаклан пеш кӱлешан улыт», – каласен Юрий Зайцев.
Тудо рашемден: 2023 ийыште Марий Элысе Калык-влакын келшымашышт пӧртым чоҥымо, рӱдоласе перинатальный рӱдерын корпусшым пужен ыштыме, тыгак Ленин проспект деч Йошкар-Олан 400-шӧ идалыкше лӱмеш тӱвыра да каныме парк марте Изи Какшан серым тӱзатыме.
Тений Йошкар-Олам да Медведево посёлкым ушышо рекреационный зоным, «Ясная поляна» чоҥалтше илыме комплексын кумдыкыштыжо Сеҥымашын 75-ше идалыкше бульварым ыштен шуктышаш улыт. Чыла паша инфраструктур бюджет кредит кӱшеш шукталтеш.
Регионысо проектла дене келшышын, 30 объектыште капитально чоҥымаш паша кая. Нунын коклаште – вӱдым пуымо (7), тазалык аралтыш (4), канализацийын эрыктыме сооруженийже (4) объект-влак. У Торъял районышто физкультур дене тазаҥдыме комплексым чоҥат, Медведево районышто искусство школым пужен ыштат. Тачысе кечын «Образование» нацпроектын «Современная школа» региональный проектшын кышкарыштыже кок школ нӧлталтеш: Йошкар-Олан «Восточный» микрорайоныштыжо – 1100 веран да Медведево районысо Руэм посёлкышто – 825 веран.
Россий министр илыме вер фондым чоҥымаш дене сай лектышыш шумым палемден. 2023 ийын 7 тылзе жапыште 291,4 тӱжем кв.метр илыме верым ыштыме.
«Ӱмашсе тыгаяк жап дене таҥастарымаште Марий Элыште шуко пачеран пӧртым пашаш колтымо кугыт 27,2 процентлан шукемын, тидыже 134,8 тӱжем кв.метр лиеш. Чоҥымо пашан вий-куатшым умбакыжат кугемдыман, илыме верым чоҥаш мланде участке-влакым ямдылыман, регионым вияҥдышаш да еҥ-влакын илышыштым саемдышаш верч чыла ыштыман», – каласен РФ Минстрой вуйлатыше Ирек Файзуллин.
Звенигово оласе Ленин, Советский, Гагарин уремлаште канализаций коллектор-влакым, тыгак Волжскышто канализацийын биологический эрыктыме сооруженийже-влакым пужен чоҥымо паша тачысе кечылан эн йодмашан улыт.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
