«Росхолод» ГК
Ужалат веле огыл, шкеат ыштат
Март мучаште «Росхолод» компаний 30 ияш лӱмгечыжым палемден. Тудым негызлыше Андрей Смирнов ден командыже тынар идалык олан, республикын да чумыр элын улан илышыж верч тыршат.
Компаний 1995 ийыште тӱҥалтышым налын – лач тунам Марий Элысе «Совиталпродмаш» ден «Марихолодмаш» гай кугу завод-влакын у продукцийыштым икымше гана Приморье кундемыште ужалыме.
Таче предприятий Россий рынкыште, СНГ эллаште пашам ышта да экономике кылым вияҥден толеш. Партнёр-влаклан парышан сервисым темла, шкенан да вес элласе производитель-влакын торгайыме 80 тӱрлӧ маркан сатуштым шаркала.
Эртыше жапыште «Росхолод» шке партнёржо-влак дене пырля элысе ойыртемалтше да кӱлешан объект-влаклан оборудованийым колтен шоген. Ты радамыште эн ончычак 2014 ийысе Теле олимпиаде вашеш Сочиште нӧлтымӧ спорт объектлам, Тӱнян футбол дене 2018 ийысе чемпионатше вашеш Россий мучко чоҥымо кугу стадионлам ончыкташ лиеш. А ковид жапыште эмлымверлам, тылеч ончычат да варат кевыт ден ресторанлам, школ ден йочасадлам, санаторий ден унагудылам ятыр вере оборудоватлыме.
Андрей Смирнов бизнесым тӱҥалмыж годым сатум ужалыше компанийым вияҥдыме шкешотан корным ойырен налын. Российыште бизнесым шарышашлан партнёр-влакын кумылыштым ушен моштыман – теве мом тудо тӱҥлан шотла. Да теве мом ушышто кучаш темла: завод-влак пашам ыштат – элат ила.
«Росхолод» 10 ий ончыч «Intercold» маналтше шке инжиниринг подразделенийжым почын. Тидыже тыгай шонымаш дене ышталтын: формат деч ойыртемалтше йӱкшыктарыше оборудований шотышто рынкын йодмашыжым шуктен кертше изделийым шке ямдылаш тӱҥалаш. Тыгодымак ончыл предприятийла деч пурышо темлымашлан чаракым ышташ огыл.
Тачысе кечын «Intercold» посна производственный компанийлан шотлалтеш да кеч-могай йодмаш почеш йӱкшыктарыше оборудованийым ямдылен кертеш. Ты радамыште йӱкшыктарыше пӧлемлан да иканаште йӱкшыктарыше оборудованийлам ончыкташ лиеш. Шукерте огыл йӱкшыктарыше камерылан омсам ышташ тӱҥалме.
Ты заводышто у участке-влак почылтыт, инженер-влак у йӧным шыҥдарат. Производствым Николай Кирьянов, Рамиль Хасанов, Михаил Мокшин, Алексей Смелов гай чолга еҥ-влак виктарат.
«Росхолод» компаний-влак тӱшкан тӱҥ поянлыкше – еҥ-влак! Нуно пашаш Волжск ола, Волжский район да Приволжский посёлко гыч веле огыл, тыгак Зеленодольск, Казань, Звенигово олала гыч толыт. Нуно шке пашаштым йӧратат, кугешнат тудын дене, вияҥ толшаш верч йӱлат.
«Росхолод» – тиде ончыл шонымашан да пашалан йӱлышӧ чонан ТОП-менеджер-влакын командышт. Нунын дене кеч-могай кӱкшытыш шуаш лиеш. Ошо, канде, йошкарге, волгыдо-канде, шем тӱсан тельняшке дене коштыт гын, таклан огыл – тидыже тыште мыняр ий (5, 10, 15, 20) ыштымышт нерген ойла. А эн кугу опытан-влакым тыште Аксакал ден Маэстро маныт. Нунын нерген Почёт оҥаште ойлалтеш, кажныштын автомобильым шогыктымо посна верышт уло. Тыште шке пашаеҥыштым аклат да эн неле задачымат ӱшанат. Да кеч-кунамат пашалан кумылан еҥым шке командышкышт налаш тореш огытыл. Но, мутат уке, пеҥгыдын йодыт – тидыжак ушнен толмашын негызше.
Юрий ИСАКОВ.
Снимкылаште: Андрей Смирнов; выставкыште.
Предприятий деч налме фото.
