Тыге лӱмден М.Шкетан лӱмеш Марий национальный драме театрыште 19 февральыште эртышаш 60 ияш лӱмгечыжлан пӧлеклалтше усталык касшым Россий Федерацийын сулло, Марий Элын калык артистше, Марий Эл Кугыжаныш премийын лауреатше Маргарита МЕДИКОВА.
М.Медикова – марий театр искусствышто ик эн волгыдын да торашке йӱлышӧ чолга шӱдыр. Кӧргӧ вий-куатан тале актрисылан режиссёр кеч-могай рольым пуа гынат, тудо чон гоч колтен, келгын чоҥа да образыш моткоч ӱшандарышын пура. Пеҥгыдын, шынден-шынден каласыме шомакше кажнын чонышкыжак вита да вӱргорнышкак шыҥа. Кажне рольым тудо устан модеш веле огыл, геройын илышыжым пӱтынек илен лектеш. Маргарита Егоровна репетицийым эр эрденак шкетын, пеле пычкемыш сценыште эртарен кертеш. Тыге тудын чонжо йодеш.
Актрисе да тудын усталык пашаж нерген газетыштына шуко возенна. Тудын нерген шкенжын «Илышнам ме шкеак модына» книгаштыжат лудаш лиеш. Туге гынат чапле лӱмгечыж вашеш икмыняр йодышлан вашмутым пален налме шуын.
– Маргарита Егоровна, лӱмгечылан пӧлеклалтше усталык касдам «Мыйын илышем – театр» манын лӱмденда. Нылле наре ий искусствын храмыштыже пашам ыштымеке гына, тыге пеҥгыдын ойлаш лиеш докан.
– Тиде чын, уло илышем театрлан пӧлеклымеке, тыге ойлаш моткоч лачеш толеш. 38 ий жапыште шуко вуйлатыше, режиссёр дене пашам ышташ да могай гына спектакльыште могай гына рольым модаш логалын огыл?! Икманаш, уло ӱмырем – театрыште. Йоча ыштыме годымат канен омыл: паша гыч йочам ыштыме пӧртыш, тушечын – уэш пашаш. Изи икшыванат кум тылзылан гастрольыш коштынам.
– Усталык касыштыда могай спектакльла гыч ужашым модын ончыктеда?
– «Эрта ӱмырем…», «Эргымлан кузык», «Оръеҥ мелна» да эше икмыняр спектакль гыч ужаш-влакым модын ончыктена. Тыгак икмыняр почеламутым лудаш тӱҥалам, театрыште пашам пырля ыштыме йолташем, тунемшем-влак мастарлыкым ончыктат.
– Те роль деч посна нигунам огыда шинче. Тылеч посна эше сылнымут произведенийлам лудыда, моноспектакльым шындеда, поэме, почеламут-влакым сценыш луктыда…
– Туге, моноспектакльым иктым веле огыл эртарыме, почеламут, поэме, ойлымаш-влакымат шуко тунемаш логалын, садлан ала-мыняр шагат дене калык ончылно лудын кертам.
– 38 ий жапыште комедийыштат, драмыштат, трагедийыштат шуко образым чоҥеда. Могай постановкышто модмо чонланда лишыл?
!!! Материалым тичмашнек 10.02.2023 лекше «Марий Эл» газетыште лудаш темлена!!!
