Лӱдыкшыдымӧ сай качестван корно
Ушнымаште… шаралтеш
«Лӱдыкшыдымӧ сай качестван корно» нацпроектын ик тӱҥ задачыже – корнышто лӱдыкшӧ деч посна кудалышташ йӧным ышташ.
«Марийскавтодор» ГКУ республикысе регионал кӱкшытан тӱшкан пайдаланыме автомобиль корнышто аварий лиймым эреак эскерен шога. Мониторингым эртарыме негызлан МВД ГИБДД-н республикысе управленийжын корнышто транспорт дене кылдалтше азап нерген данныйже налалтеш.
Аварий шуко лийме ик тыгай верлан Йошкар-Ола – Уржум да Шоя-Кузнецово – Акшубансола автокорно-влак ушнымаш шотлалтеш. Водитель-влак Шоя-Кузнецово изи корно гыч Йошкар-Ола – Уржум тӱҥ трассыш лекташ неле улмо нерген ик гана веле огыл вуйым шийын ойленыт, вет тушто кудалыштмаш пеш виян: суткаште 12000 автомобиль эрта. Йолешке вончымо вер, корнысо писылыкым иземдаш кӱштышӧ знак, фото-видео йӧн дене войзен налше камер улыт гынат, тиде участкым йолешке-влак пеш лӱдын вончат.
Санденак, аварий лӱдыкшым кораҥдышашлан тысе корно-влак ушнымо верым уэмдаш, светофор установкым шындаш, ты кундемым волгалтараш, писылыкым иземдыме гыч кугемдыме полосам ышташ палемдыме. Тыгак транспортым вучаш йӧнан лийже манын, автобус шогалме вер да чарналтыш лийшаш улыт.
Объектыште паша ышталтеш. Кызытсе жаплан «Медведевоагродорстрой» ОАО подряд организаций корно тӱрысӧ кушкылым кораҥден, ошмам да негызлан тыгыде кӱм шарен. Тудын кажне лончыжо тӱткын тергалтеш. Шушаш ийыште корнын вес велыштыже, 12,4-ше гыч 14-ше километр марте ужашыште, тыгаяк паша шукталтеш, тыгак волгалтарыше лампылан меҥгылам шогалташ негыз ышталтеш. Пашан чумыр акше 92 миллион теҥгеш шуэш. Объектым кок ийлан палемдыме – 2025 ий 30 октябрьлан мучашлыман.
Юрий ИСАКОВ
Фотом «Марийскавтодор» ГКУ деч налме
