Кодшо каныш кечылаште Марий Элыште Российсе туриндустрий ушемын еҥже-влакын слётышт эртен.
Федеральный, региональный туроператор, круиз компаний-влакын еҥышт, турист сферысе да унам вашлийме шотышто эксперт-влак толыныт. Нуно мемнан регионышто кумылым налше верла, кундемнан историйже, калыкнан ойыртемалтше койышыжо, тӱвыраже да йӱлаже дене палыме лийыныт. Мероприятийым торжественно Патриарший площадьыште почыныт. Толшо-влакым марий муро, куштымаш дене «сийленыт».
Марий Элын спорт да туризм министрже Лидия Батюкован палемдымыж почеш, Российысе турбизнесын 80 наре представительже рӱдолашкына толын. Республикынам ончен кайыме деч вара ме нунын деч ваш келшен пашам ыштыме, у маршрут-влакым почмо дене кылдалтше ойпидышым ышташ темлымашым вучаш тӱҥалына. Российын регионлаж гыч Марий Элыш толаш кумылан турист-влак шукемыт манын ӱшанена. Тыгак лийже манын министерстве слётыш толшо-шамычлан поян программым ямдылен ыле.
Икымше кечынже нунылан Йошкар-Ола мучко автобус дене кудалыштме да йолын коштмо экскурсий-влакым эртареныт, олан ойыртемалтше сынжым почын пуышо объектла дене палдареныт. Т.Евсеев лӱмеш национальный тоштерыш, Национально-художественный гелерейышкат намиеныт. Республикын брендышкыже савырныше сырым авызлаш «Сыр лавкышкат» коштыктеныт.
Кокымшо кечын уна-влак Козьмодемьянскыште лийыныт. А тушто турист-шамычлан ончыктышашлык объект ятыр, олан архитектурыжат сымыстара. Уна-влак дене тушто Марий Эл правительстве председательын икымше алмаштышыже Михаил Васютин вашлийын.
С.Носова
Снимкыште: Марий Элыш толшо турбизнес еҥ-влакын слетышт годым.
Фотом Спорт да туризм министерствын лаштыкше гыч налме.
