Мо мо, а пӱртӱс шотышто Юмо мемнам куандарак. Ме шкежат тудым арален да тӱзатен толына.
Таклан огыл тачысе кечылан Марий Элыште эсогыл федерал кӱкшытыштӧ посна аралыме кум кумдык уло: «Марий чодра» национальный парк, «Кугу Какашан» заповедник да Юл кундем технологий кугыжаныш университет пелен ыштыме Ботанический сад. Тидын деч посна региональный кӱкшытан – 52 посна аралыме пӱртӱс кумдык. Тышеч 10-жо заказник да 42-шо – пӱртӱс памятник. 11 январьыште Российыште Национальный парк ден заповдник-влакын кечыштым палемдымым шотыш налын, республикыштат тыгай кумдык-влак улмым ушештарымак шуэш. Эколог-влакын палемдымышт почеш, лишыл жапыште аралыме кумдыкыш савыраш палемдыме объектшат улыт.
Кажныже мо дене гынайт ойыртемалтеш. «Кугу Какшан» заповедникымак налаш. Тушто курымла дене кушшо тумо шуко. Тыгак кугу лончо торфым аралыше еран-купан Коше — ерымат ончыкташ лиеш. Заповедникыште озанлык пашам шукташ ок лий, сонарлаш, колым кучаш монь чарыме гынат, ир пӱртӱсым ужаш шонышо-влаклан тушто тыршыше специалист-шамыч лӱмын экскурсийым эртараш тӱҥалыныт.
С.Носова
