Марий Эл вуйлатыше Юрий Зайцев ХХIV федерал Сабантуйлан ямдылалтме да тудым эртарен колтымо шотышто оргкомитетын заседанийжым эртарен.
Тушко Татарстан Республикын премьер-министржын алмаштышыже, Татар-влакын тӱнямбал конгрессыштын национальный советшын председательже Василь Шайхразиев толын.
Федерал Сабантуйын тӱҥ мероприятий-влак 5-6 июльышто Медведево ипподромышто эрташ тӱҥалыт. Ончылгоч рашемдыме почеш, тушко элнан 72 регионжо гыч 500 наре делегат толшаш.
В.Шайхразиев Всероссийский Сабантуйлан ямдылалтме пашам эртарымылан тауштен да каласен: «Ме але марте ты пайремым эртараш тыге сайын ямдылалтмым ужын огынал. Тидыже моло регионланат сай пример. Марий Элыште эртышашлык пайремым тушко толшо-влак шуко жаплан шарнен кодыт манын ӱшаныме шуэш».
Тачысе кечылан Сабантуй эртышашлык кумдыкым тӱзатыме да инфраструктурым ямдылыме. Уна-влакым тӱрлӧ тематический площадке-влак вучат: литературно-музыкальный, театрализоватлыме, кумылым нӧлтымӧ, модмо, сатум ужалыме. Кугу спорт программым ямдылыме, имнешке-влакын таҥасымашышт, армрестлинг, масс-рестлинг, кирам нӧлтымаш, куреш кучедалмаш эртат.
Юрий Зайцев пайрем сайын, мотор йӱла, оҥай мероприятий да таҥасымаш-влак дене эртышаш манын палемден.
Марий Эл вуйлатышын пресс-службыжын уверже негызеш С.Носова ямдылен.
