Тений шыжым марий кечышот радам дене кылдалтше икымше пайрем Ош Кугу Юмылан сай киндым шочыкташ, ончен кушташ полшымыжлан тауштымашлан пӧлеклалтеш, «Угинде» маналтеш.
Респубикысе Марий тӱвыра рӱдер тудым 14 октябрьыште – Покро кечын – Йошкар-Оласе Чарла кремльыште эртара. Регион-влак кокласе кӱкшытан мероприятийыште киндым пыштыме тошто да у рецепт-влак дене палдарат, ончаш толшо-влакым, кугезе йӱлалан эҥертен, тӱрлӧ кинде дене сийлат. Тидыже конкурс семын эртышаш. Тидын годымак Чарла кремльыште киндым да тӱрлӧ когыльым ыштен лукшо ялозанлык предприятий, фермер, посна озанлыкым кучышо-влакын сатуштым ужалыме ярмиҥга эрта. Шурным киндым пышташ йӧрышӧ йӧрварыш савыраш полшышо тошто да кызытсе арверымат ужаш йӧн лиеш. «Кылта кырымашымат», «пырчым йоҥыштымымат» организатор-влак ончыктат.
Сценыште эртыше пайрем концерт кумылым нӧлташ тӱҥалеш. Икманаш, угиндым чапландарыме йӱлам ужаш шонышо-влак мероприятий гыч шужышо да кумыл деч посна кайышаш огытыл.
С.Носова
Авторын фотожо
