2 апрельыште Йошкар-Олаште, Антикризисный рӱдерыште, Марий Элын Общественный палатыжын у составшын икымше заседанийже эртаралте. Тушто республик вуйлатыше лийын.
Юрий Зайцев кугыжаныш орган-влакын мер организацийла дене вашкылыштын кӱлешлыкышт нерген ойлыш. Тыгак у составлан у нацпроект-влакым илышыш шыҥдарымым эскерыме пашам шуктыман манын каласыш.
– Россий президент Владимир Владимирович Путин кузе палемден, нацпроект-влак полшымо дене еҥ-влакын эн тургыжландарыше йодышыштым решатлыман. Марий Элын Общественный палатыже –калыкын тазалыкшым аралыме, икшыван еш-влакын илышыштым саемдыме, кугурак ийготан-влаклан полышым пуымо, шкем ончыкташ йӧным да илышлан лӱдыкшыдымӧ средам ыштыме, кугу лектышан предприниматель пашам шукташ полшымо дене кылдалтше да моло темлымаш-влакым каҥашаш келшыше площадке, – палемдыш республик вуйлатыше.
Общественный палатын шуктышаш пашаже-влак радамыште тыгак законопроект-влакын мер экспертизыштым эртарымаш, тӱрлӧ темлымаш-влакым илышыш шыҥдараш, СВО-што улшо военнослужащий-влаклан полшымаш, сайлымаш процессым эскерымаш да икмыняр моло улыт.
Тиде заседанийыштак Общественный палатын у составшын еҥже-влак кокла гыч, а тушко чылаже 33 еҥ пурталтын, вуйлатышым сайлышт. Ик йӱк дене председательлан уэш але марте тиде пашам шуктышо Герман Дементьевымак кодышт. Тылеч вара председательын кум алмаштышым сайлышт. Але марте нуно коктын лийыныт гын, ынде кум еҥым сайлышт. Палатын заседанийыштыже кызытсе нарак, кандаш комиссийым кодышт. Нунын председательышт, еҥышт-влак дене палдарышт.
Любовь Камалетдинова
