Шорык
Арняда ласка огеш лий. Ешыште кӧн мутшо эн тӱҥ улмо шотышто пелашда дене ӱчашымашке шуыда. Когыньданат ӱскырт койышым ончыктымыда нимо сайышкат огеш кондо. Каныш кечылаште уна-шамычым вашлияш ямдылалтса.
Презе
Пашаштат, мӧҥгыштат сомыл ятыр лиеш, сандене вий-куатда чотак пыта. Тидлан кӧра черланен кертыда. Тыге ынже лий манын, тазалыкдам эскерыза. Каныш кечылаште иктаж-кушко миен толын кертыда. Палыме лияш йӧн лектеш. Сай уверым колыда.
Йыгыр
Йӧратен шындыше Йыгыр-шамычын кажне кечын шуктымо пашалан жапышт огеш лий, вет нуно шкеныштым туге кучаш тӱҥалыт, пуйто шӱмбелышт деч моло тӱняште тетла иктат да нимоат уке! Но шекланыза: тудын дене сырымашке шуын кертыда.
Рак
Пашаштыда ала-могай пӱсӧ йодышлан кӧра нервыда сайынак локтылалтеш. Адакшым мӧҥгыштат тургыжланаш амал лектеш. Тыгодым лишыл еҥда-влакат нунылан тӱткышым шагал ойырымыланда шылталаш тӱҥалыт, сандене чытыза гына!
Лев
Арнядам тӱрлӧ вере шуаш, еҥ-влаклан полшаш тыршен куржтал эртареда. Но шукынжо тендан дене пайдаланат веле манын умыледа, вет южышт сӧрымыштым шукташ огыт тӱҥал. Каныш кечылам шкет эртараш тыршыза, иктаж-кушко миен толза.
Ӱдыр
Тендам окса дене кылдалтше йодыш ик эн чот тургыжландараш тӱҥалеш. Тидлан амалым иктаж-мо пудыргымат ыштен кертеш. Каныш кечылаште веле ласкан шӱлалтеда. Тиде жапыште йӧратыме еҥда дене ончыкылыклан планым ыштыза.
Виса
Ешан-влаклан куштылгыжак огеш лий. Пелашдам чыла вере гаяк эскераш тӧчымыда нимо сайыш огеш шукто. Тыге те шкендам кидыште кучен огыда керт да коктын сырымашке шуын, очыни. Каныш кечыла вашеш веле кылда тӧрлана.
Скорпион
Производствышто пашам ыштыше-влаклан тӱткӧ лийман – сусырген кертыда. Мӧҥгыштат электричестве дене пайдаланыме годым эскералтыман.
Шкет шагалрак лияш тыршыза, уке гын жапым тургыжланен веле эртареда. Шуматкечын але рушарнян иктаж-кушко миен толза.
Пикшызе
Тиде арнян шонымашкыда путырак писын шуаш тыршаш тӱҥалыда. Азартный модмашке ушныман огыл. Йолташда-влакын ойыштым шотыш налза. Каныш кечылаште лишыл еҥда-влаклан тӱткышым да жапым шукырак ойыраш тыршыза.
Ирказа
Тыланда шке шонымашдам чотак аралаш логалеш. Кызытсе паша верда «лӱҥгаш» тӱҥал кертеш. Еҥ-шамычын шылтален каласымыштым шыдын вашлийыда да туран вашешташ тыршеда. Но тыге ыштыме деч ончыч шоналтыза: шкем тыге кучаш кӱлеш мо?
Вӱд йоктарыше
Тӱрлӧ вере шинчымашым погышо але тунеммашым эртыше-влакым ласка огыл арня вуча. Турист семын иктаж-кушко кайыше-влак маршрут кучалтмылан але вашталтмылан кӧра нелылыкыш логал кертыт. Тидыже каныш нерген уда шарнымашым кода.
Кол
Тыланда шӱдыр-влак оксам аныкленрак кучылташ темлат. Вийым ончыкташ кӱлмӧ таҥасымашлашке ушныман огыл. Каныш кечылам усталык дене кылдалтше пашам шукташ пӧлеклыза. Тиде жапыште кумылдам нӧлтышӧ ятыр тат вуча.
Л.КАМАЛЕТДИНОВА
