Йошкар-Олан мэрже Е.Маслов ден тудын алмаштышыже Л.Новоселова 65-ше да 79-ше йочасадлаште единый йоча менюн шукталтмыжым тергеныт.
Ушештарена, икшывым пукшымо тӱҥ принцип-влаклан келшыше коло кечаш единый менюм Йошкар-Оласе йочасадлашке 2017 ий 1 сентябрь гыч пуртымо.
У меню шотышто Евгений Маслов йочасад вуйлатыше, повар, ача-ава да икшыве-шамыч денат мутланен.
– Продуктым наледыме шотышто уто роскотым ыштыме огыл. Финансирований ончычсо гаяк кодын. Икшывын кочкышыжым ачаж ден аваже тӱлат, сандене менюмат эн ончычак нунылан, тыгак йоча-шамычлан аклаш пуэна, – манын мэр.
Йочасад вуйлатыше-влакын палемдымышт почеш, у меню палынак поян да оҥай лийын. Единый менюш куснымо дене икшыве-шамыч тылеч ончычсо акешак балансироватлыме кочкышым кочкыт, тылеч посна южо тӧнежыште пытартыш ийлаште палдырныше ситыдымаш-влак кораҥдалтыт. Адакше повар-влак тыглай продукт денак тамлырак бюдо-влакым ямдылат.
Единый йоча менюм Роспотребнадзорын специалистше-влак ыштеныт, тыгодым нуно йоча организаций деке санитарно-эпидемиологический йодмашым, икшыве-шамычын физиологий ойыртемыштым, нӧргӧ организмлан кӱлшӧ калорийын чотшым шотыш налыныт.
Кызыт кум-шым ияш ӱдыр-рвезе-влак йочасадыште кечеш ныл гана кочкыт. Кечаш менюштышт шӧр, шыл (але кол), пареҥге, пакчасаска, емыж-саска, тӱрлӧ шӱраш улыт. Моло шӧр продукт ден сурткайык шылым арняш 2-3 гана кочкыт. Кочкыш сырьё шотеш верысе продукцият кучылталтеш.
М.ИВАНОВА.
