УВЕР ЙОГЫН

Шинчымаш кече дене саламленыт

Марий Эл правительствын еҥже, профильный ведомство-влакым вуйлатыше-шамыч 1 сентябрьыште республикнан  икмыняр школыштыжо лийыныт, увертара Марий Эл вуйлатышын организаций да аналитике виктемже.

Правительстве председательын икымше алмаштышыже М.Васютин тиде кечын Курыкмарий районыш миен. Шинчымаш кече дене тудо Микрак ден Сурский школлаште тунемше ден пашам ыштыше-влакым саламлен. Микрак школ Марий Элыште ик эн тоштылан шотлалтеш. Тудо 1881 ийыште почылтын. Ӓвасир ялыште Сурский школ республикын рӱдолаж деч эн тораште верланен.

Михаил Васютин республик вуйлатыше Александр Евстифеевын  туныктышо-влакым Шинчымаш кече дене саламлымыжым лудын пуэн, чылаштлан пиалан тунемме ийым тыланен. Варажым тудо Козьмодемьянск оласе йоча усталык пӧртыш миен да нунымат Шинчымаш кече дене саламлен.

Волжск оласе 2-шо №-ан школышто пайрем линейкыште правительстве председательын икымше алмаштышыжеА.Россошанский лийын да ӱдыр-рвезе ден педагог-влакым у тунемме ий тӱҥалме дене саламлен. Тунемме учреждений тиде кундемын эргыже Россий Герой В.Ивановын лӱмжым нумалеш. Марий Элыште тиде лӱмым тудо икымше налын. Варажым Андрей Россошанский  тулык йоча ден ача-аван полышышт деч посна кодшо икшыве-влаклан Волжск оласе рӱдерыш миен.

Правительстве председательын икымше алмаштышыже С.Воронцов Медведево районысо Сенькан школын тунемшыже ден туныктышыжо-влакым Шинчымаш кече дене саламлен.

Л.ШАБДАРОВА.

Опубликовать в Одноклассники

Добавить комментарий